୮ମ ବେଙ୍ଗାଲୁରୁ ଅନ୍ତର୍ଜାତୀୟ ଚଳଚ୍ଚିତ୍ର ଉତ୍ସବରେ ଏକମାତ୍ର ଓଡ଼ିଆ ସିନେମା ‘ତୁଳସୀ ଅପା’
Thursday February 04, 2016,
2 min Read
ବେଙ୍ଗାଲୁରୁର ପିଭିଆର୍ ସିନେମା ଓ ମହୀଶୂରର ଆଇନକ୍ସ ସିନେମା ହଲରେ ଚାଲିଥିବା ୮ମ ବେଙ୍ଗାଲୁରୁ ଅନ୍ତର୍ଜାତୀୟ ଚଳଚ୍ଚିତ୍ର ଉତ୍ସବରେ ଏକମାତ୍ର ଓଡ଼ିଆ ଚଳଚ୍ଚିତ୍ର ଭାବେ ପ୍ରଦର୍ଶିତ ହୋଇଛି ତୁଳସୀ ଅପା । ପଦ୍ମଶ୍ରୀ ତୁଳସୀ ମୁଣ୍ଡାଙ୍କ ଜୀବନ ଆଧାରିତ ଏହି ଚଳଚ୍ଚିତ୍ରର ପ୍ରଯୋଜନା ଅନୁପମ ପଟ୍ଟନାୟକ କରିଥିବା ବେଳେ ନିର୍ଦେଶନା ଦେଇଛନ୍ତି ଖ୍ୟାତନାମା ସିନେନିର୍ମାତା ଅମିୟ ପଟ୍ଟନାୟକ ।
ପଢନ୍ତୁ - ପ୍ରଥମ ଥର ପାଇଁ ଭାରତରେ ହେଉଛି ଅନ୍ତର୍ଜାତୀୟ କ୍ୟାମ୍ପସ୍ ସିନେମା ଉତ୍ସବ
ଉତ୍ସବର ୭ମ ଦିନରେ (୩ ଫେବ୍ରୁଆରି ୨୦୧୬) ପ୍ରଦର୍ଶିତ ହୋଇଛି ‘ତୁଳସୀ ଅପା’ । ମଲ ଅଫ୍ ମହୀଶୂରରେ ଥିବା ଆଇନକ୍ସ ସିନେମାର ଦ୍ୱିତୀୟ ପରଦାରେ ପୂର୍ବାହ୍ନ ୧୦ଟା ୧୦ ମିନିଟରେ ପ୍ରଦର୍ଶିତ ହୋଇଛି ଏହି ଓଡ଼ିଆ ଚଳଚ୍ଚିତ୍ର । ୨୦୧୪ ମସିହାରେ ନିର୍ମିତ ହୋଇଥିବା ୧୨୧ ମିନିଟ ଅବଧିର ଏହି ଚଳଚ୍ଚିତ୍ରଟି ପୂର୍ବରୁ ଏକାଧିକ ଅନ୍ତର୍ଜାତୀୟ ଉତ୍ସବରେ ପ୍ରଦର୍ଶିତ ହୋଇ ଉଚ୍ଚ ପ୍ରଶଂସିତ ହୋଇ ସାରିଛି ।
୧୭୦ ସିନେମା, ୧୮ ଭାଷା, ୬୧ ଦେଶ
୨୦୧୬ ମସିହା ଜାନୁଆରି ୨୮ରୁ ଆରମ୍ଭ ହୋଇ ଫେବୃଆରି ୪ରେ ଶେଷ ହେଉଥିବା ଏହି ଅନ୍ତର୍ଜାତୀୟ ସିନେମା ଉତ୍ସବରେ ଏଥର ୬୧ଟି ଦେଶରୁ ମୋଟ ୧୮ଟି ଭାଷାର ୧୭୦ ସିନେମା ଅଂଶଗ୍ରହଣ କରିଛନ୍ତି । ଏଥର ଉତ୍ସବରେ ମେକ୍ସିକୋ, ଇରାନ ଓ ତୁର୍କୀ (ଫୋକସ୍ କଣ୍ଟ୍ରି) ଅଧିକ ଗୁରୁତ୍ୱ ବହନ କରିଛି । ଆୟୋଜକ ରାଜ୍ୟ କନ୍ନଡ଼ ଭାଷାର ୧୫ଟି ସିନେମା ଅଂଶଗ୍ରହଣ କରିଥିବା ବେଳେ ଏହା ଭିନ୍ନ ଓଡ଼ିଆ ସମେତ ବିଭିନ୍ନ ଭାରତୀୟ ଭାଷାର ୧୩ଟି ସିନେମା ରହିଛି । ଭାରତ ଭିନ୍ନ ଅନ୍ୟାନ୍ୟ ଏସୀୟ ଦେଶମାନଙ୍କରୁ ୧୨ଟି ସିନେମା ଆସିଥିବା ବେଳେ ବାକି ସିନେମା ପୃଥିବୀର ବିଭିନ୍ନ ଦେଶରୁ ଆସିଛି ।
ଉତ୍ସବ ଉଭୟ ବେଙ୍ଗାଲୁରୁ ଓ ମହୀଶୂର ସହରରେ ଚାଲିଛି । ସପ୍ତାହ ପାଇଁ ମୋଟ ଦୁଇଟି ସିନେମା କମ୍ପ୍ଲେକ୍ସରେ ଚଳଚ୍ଚିତ୍ର ଉତ୍ସବ ହେଉଛି । ବେଙ୍ଗାଲୁରୁର ଓରିଅନ ମଲରେ ଥିବା ପିଭିଆର୍ ସିନେମାର ସମସ୍ତ ୧୧ଟି ପରଦାରେ ସିନେମା ପ୍ରଦର୍ଶିତ ହେଉଥିବା ବେଳେ ମହୀଶୂରରେ ଥିବା ଆଇନକ୍ସର ୪ଟି ପରଦା ଏଥିପାଇଁ ବ୍ୟବହୃତ ହୋଇଛି । ପ୍ରଥମ ଥର ପାଇଁ ନିଜେ କର୍ଣ୍ଣାଟକ ମୁଖ୍ୟମନ୍ତ୍ରୀ ସିନେମା ଅାୟୋଜନ କମିଟିର ଅଧ୍ୟକ୍ଷ ଅଛନ୍ତି ।
ଆଉ କିଛି ସମାନ ଧାରାର କାହାଣୀ ପଢନ୍ତୁ -
2। ଗେ’ ବିଶ୍ୱ ସୁନ୍ଦର ପ୍ରତିଯୋଗିତାରେ ଭାରତର ପ୍ରତିନିଧିତ୍ୱ କରିବେ ଓଡ଼ିଆ ପୁଅ ଅନ୍ୱେଷ
3। ପ୍ରେମ ପାଇଁ ସାଇକେଲରେ ସ୍ଵିଡେନ ଗଲେ ପ୍ରଦ୍ୟୁମ୍ନ
ଲେଖକ ଶୁଭ୍ରାଂଶୁ ପଣ୍ଡା ଜଣେ ସାହିତ୍ୟିକ ଓ ସାମ୍ବାଦିକ ଭାବେ ଜଣାଶୁଣା । ତାଙ୍କୁ +91 9338655845 କିମ୍ବା [email protected] ରେ ଯୋଗାଯୋଗ କରାଯାଇ ପାରିବ।