ଭେଙ୍କେଟ ସ୍ୱାମୀଙ୍କ ଅରବିନ୍ଦ ଆଇ କେୟାର ହସପିଟାଲ ବିଶ୍ୱରେ ଅନ୍ୟତମ ଶ୍ରେଷ୍ଠ ସାମାଜିକ ପ୍ରତିଷ୍ଠାନର ମାନ୍ୟତା ପାଇବା ପଛରେ ଥିବା ୬ଟି ପ୍ରମୁଖ କାରଣ

ପାଂଚ ଦିନର ଯାତ୍ରା ପରେ ଜାଗୃତି ଟ୍ରେନ୍ ତାମିଲନାଡ଼ୁର ମଦୁରାଇରେ ପହଂଚିଲା । ସେଠାରେ ରହଣିର ଏକ ସଂପୂର୍ଣ୍ଣ ଦିବସ ସ୍ୱାସ୍ଥ୍ୟସେବା ପ୍ରସଙ୍ଗରେ କେନ୍ଦ୍ରୀଭୂତ କଲା । ଏହି ପରିପ୍ରେକ୍ଷୀରେ ଦେଶର ସ୍ୱାସ୍ଥ୍ୟ ସେବା ସହ ଲକ୍ଷାଧିକ ଲୋକଙ୍କ ଜୀବନ ରକ୍ଷା କରିଥିବା ଅନ୍ୟତମ ପ୍ରମୁଖ ସାମାଜିକ ପ୍ରତିଷ୍ଠାନ, ଅରବିନ୍ଦ ଆଇ କେୟାର୍ ହସ୍ପିଟାଲ୍ ସଂପର୍କରେ ଅବଗତ କରାଇଲା ।

---

ସମଗ୍ର ବିଶ୍ୱରୁ ଅନ୍ଧତ୍ୱ ପୂର କରିବା ସେମାନଙ୍କ ଲକ୍ଷ୍ୟ । ସମଗ୍ର ବିଶ୍ୱରେ ୪୫ ନିୟୁତ ଚକ୍ଷୁହୀନ ଲୋକ ଅଛନ୍ତି ଏବଂ ସେମାନଙ୍କ ମଧ୍ୟରୁ ୧୨ ନିୟୁତ ଭାରତରେ ରହନ୍ତି । ତେବେ ସବୁଠାରୁ ଗୁରୁତ୍ତ୍ଵପୂର୍ଣ୍ଣ କଥାହେଲା ଏହା ମଧ୍ୟରୁ ୮୦ପ୍ରତିଶତ ଅନ୍ଧତ୍ୱ / ଚକ୍ଷୁହୀନତାକୁ ପ୍ରତିରୋଧ କରାଯାଇପାରିବ । ସେଠାର କର୍ମଚାରୀଙ୍କ ଆଭିମୁଖ୍ୟ ଏବଂ ଗୁଣାତ୍ମକ ଚିନ୍ତାଧାରା ଆମକୁ ସବୁଠାରୁ ଅଧିକ ପ୍ରଭାବିତ କଲା । ଏହା ହେଉଛି ଅରବିନ୍ଦ ଆଇ କେୟାରର ପ୍ରତିଷ୍ଠାତା ଡା. ଜି ଭେଙ୍କେଟସ୍ୱାମୀଙ୍କ ଦ୍ୱାରା ପ୍ରଦତ୍ତ ଏକ ଉଚ୍ଚମାନର ପରଂପରା ।

୧୯୭୬ ମସିହାରେ ତାଙ୍କୁ ଯେତେବେଳେ ୫୮ ବର୍ଷ ସେତେବେଳେ ସେ ଏହି ହସ୍ପିଟାଲର ପ୍ରତିଷ୍ଠା କରିଥିଲେ । ସେହିସମୟରେ ହସ୍ପିଟାଲଟି ମାତ୍ର ୧୧ଶଯ୍ୟା ବିଶିଷ୍ଟ ଥିଲା । କିନ୍ତୁ ବର୍ଷ ପରେ ବର୍ଷ ନିଜର ଅକ୍ଲାନ୍ତ ତ୍ୟାଗ ଓ ପରିଶ୍ରମ ଯୋଗୁଁ ହସ୍ପିଟାଲର କଳେବରକୁ ବୃଦ୍ଧି କରାଇବା ସହ ବିଶ୍ୱର ଏକ ଖ୍ୟାତନାମା ହସ୍ପିଟାଲରେ ପରିଗଣିତ କରାଇପାରିଛନ୍ତି ।

ଏକ ଦଶନ୍ଧୀ ପୁର୍ବେ ଡା. ଭେଙ୍କଟସ୍ୱାମୀଙ୍କ ଦେହାନ୍ତ ଘଟିଛି, କିନ୍ତୁ ତାଙ୍କ ଦ୍ୱାରା ପ୍ରଦର୍ଶିତ ପଥ ଓ ଆଦର୍ଶ କମ୍ପାନୀର ବିରାଟ ସ୍ତମ୍ଭ ରୂପେ ଠିଆ ହୋଇଛି । ଯଦି ଆପଣ ଏକ ଶ୍ରେଷ୍ଠ ସାମାଜିକ ପ୍ରତିଷ୍ଠାନ ସୃଷ୍ଟି କରିବାକୁ ଯାଉଛନ୍ତି ତେବେ ଅରବିନ୍ଦ ଆଇ କେୟାରର ଅଦ୍ୱିତୀୟତାକୁ ଦୃଷ୍ଟିରେ ରଖନ୍ତୁ । 

୧।ସମ୍ବଳ ଠାରୁ ଅଭିଳାଷା ଶ୍ରେଷ୍ଠତର

କେବଳ ୧୧ଶଯ୍ୟା ବିଶିଷ୍ଟ ହସ୍ପିଟାଲରୁ ବିଶ୍ୱର ଏକ ଶ୍ରେଷ୍ଠ ସାମାଜିକ ପ୍ରତିଷ୍ଠାନରେ ପରିଣତ କରିବା କଷ୍ଟକର । କିନ୍ତୁ ଡା. ଭେଙ୍କଟସ୍ୱାମିଙ୍କ ଅଭିଳାଷା ଅତୁଳନୀୟ ଅଟେ । ତାଙ୍କ ନିକଟରେ କୌଣସି ବଡ଼ ପୁଞ୍ଜିନିବେଶକ କିମ୍ବା ଅର୍ଥ ନଥିଲା ଯାହା ବଳରେ ସେ ନିଜର ପ୍ରକଳ୍ପକୁ ଏକ ବିରାଟ ରୂପ ଦେଇପାରିବେ । କିନ୍ତୁ କ୍ରମାଗତ ପରିଶ୍ରମରେ ସେ ଏଭଳି ଏକ ବ୍ୟବସାୟିକ ଯୋଜନା ପ୍ରସ୍ତୁତ କଲେ ଯଦ୍ୱାରା ସେ ଏକ ସ୍ଥାୟୀ ସାମାଜିକ ପ୍ରତିଷ୍ଠାନ ସୃଷ୍ଟି କରିପାରିବେ । ଯେତେବେଳେ ଉପଲବ୍ଧ ଶଯ୍ୟାର ଅଭାବ ହେଲା ସେ ଏକ ନୂତନ ଶଯ୍ୟା ସଂଯୋଗ କଲେ । ଯେତେବେଳେ ସ୍ଥାନର ଅଭାବ ହେଲା ସେ ନୂତନ ଭାବେ ନିର୍ମାଣ କଲେ। କେବଳ ଭାରତରେ ହସ୍ପିଟାଲ ଗୁଡ଼ିକ ନିର୍ମାଣ ନୁହେଁ ବିଶ୍ୱର ୭ଟି ବିଭିନ୍ନ ଦେଶରେ ଅନ୍ୟ ହସ୍ପିଟାଲର ନିର୍ମାଣ କରିଛନ୍ତି । ଏହା ହେଉଛି ତାଙ୍କର ସୀମିତ ସମ୍ବଳର ପରିସୀମାରୁ ଅତିକ୍ରାନ୍ତ ଅଭିଳାଷାର ଶକ୍ତି ।

୨।ବିଶ୍ୱକୁ ପରିବର୍ତ୍ତନ କରିବାକୁ ହେଲେ ନିଜର ଜୀବନକୁ ନିୟନ୍ତ୍ରଣ କରନ୍ତୁ

ସାମାଜିକ ପ୍ରତିଷ୍ଠାନ ପ୍ରତିଷ୍ଠାତାଙ୍କ ଏହା ହେଉଛି ଏକ ଉଲ୍ଲେଖନୀୟ ଗୁଣାବଳୀ । ଯଦି କୌଣସି ଠାରେ ତ୍ରୁଟିବିଚ୍ୟୁତି ଦେଖାଦିଏ ତେବେ ଏହା ସଂପର୍କରେ ସେ ଅଭିଯୋଗ କରିବା ଅପେକ୍ଷା ଏହାକୁ ଠିକ୍ କରିବାକୁ ନିଜଆଡ଼ୁ ଚେଷ୍ଟା ଆରମ୍ଭ କରିଦିଅନ୍ତି । ଏଭଳି ଜଣେ ବ୍ୟକ୍ତିତ୍ୱର ଅଧିକାରୀ ଥିଲେ ଡା. ଭେଙ୍କଟସ୍ୱାମୀ । ତାଙ୍କର ଅତୁଳନୀୟ ପ୍ରତିବଦ୍ଧତା ଥିଲା ଯଦ୍ୱାରା ସେ ଅସମ୍ଭବକୁ ବି ସମ୍ଭବ କରିପାରୁଥିଲେ । ପ୍ରକାରାନ୍ତରେ ସେ ଜଣେ ଉଚ୍ଚକୋଟିର ନେତା ଥିଲେ କାରଣ, ସେ ନିଜର ଚିନ୍ତାଧାରା ସଂପର୍କରେ ଅନ୍ୟମାନଙ୍କୁ ସହଜରେ ବୁଝାଇପାରୁଥିଲେ ଏବଂ ଲୋକଙ୍କୁ ପ୍ରଭାବିତ କରିପାରୁଥିଲେ । ଯେଉଁଲୋକମାନେ ନିଜର ଚିକିତ୍ସା କରାଇପାରୁନଥିଲେ ସେମାନଙ୍କ ପାଇଁ ଏକ ସ୍ଥାୟୀ ବ୍ୟବସ୍ଥା ନିର୍ମାଣ କରିବା ସହ ଚକ୍ଷୁହୀନ ଲୋକଙ୍କ ଜୀବନକୁ ପରିବର୍ତନ କରିବାକୁ ସେ ଇଚ୍ଛା ପ୍ରକାଶ କରିଥିଲେ ।

୩।ପ୍ରଥମେ ନିଜକୁ ନେତୃତ୍ଵ ନେବାକୁ ପଡ଼ିବ

ଜଣେ ବ୍ୟକ୍ତିର ବୃତ୍ତିଗତ କ୍ଷେତ୍ରରେ ବିକାଶ ପାଇଁ ବିଭିନ୍ନ ସୋପାନ ରହିଥାଏ । ଆପଣ ଜଣେ ଦକ୍ଷତାସଂପନ୍ନ ବ୍ୟକ୍ତି ହୋଇପାରନ୍ତି କିମ୍ବା ଜଣେ ସମ୍ବଳପୂର୍ଣ୍ଣ ଟିମ୍ ସଦସ୍ୟ, ଏକ ଦକ୍ଷ ପ୍ରଶାସକ କିମ୍ବା ପ୍ରଭାବଶାଳୀ ପରିଚାଳକ, କିନ୍ତୁ ବିଶ୍ୱକୁ ପରିବର୍ତ୍ତନ କରିବାକୁ ହେଲେ ଜଣେ ନେତାର ଆବଶ୍ୟକତା ରହିଛି । ଏବଂ ଡା. ଭେଙ୍କଟସ୍ୱାମୀ ସେଇ ନେତାମାନଙ୍କ ମଧ୍ୟରୁ ଜଣେ । ବ୍ୟକ୍ତିଗତ ନମ୍ରତା ସହ ବୃତ୍ତିଗତ ଇଚ୍ଛାଶକ୍ତି ଦ୍ୱାରା ନିଜର ପରାକାଷ୍ଠା ନିର୍ମାଣ କରିଥିଲେ । ତାଙ୍କର ପ୍ରଖର ଦୂରଦୃଷ୍ଟି ସହ ଯୋଗାଣର କୌଶଳ, ସୃଜନତାତ୍ମକ ବିପ୍ଣନ ଓ ସାମାଜିକ ଦାୟିତ୍ୱବୋଧ ଗୁଣ ରହିଥିଲା । ସେ ଏକ ସାଧାରଣ ଜୀବନଯାପନ ଶୈଳୀ, ସହାନୁବନ୍ଧନ ଏବଂ ଗଠନମୂଳକ ଦକ୍ଷତାର ଏକ ପ୍ରକୃଷ୍ଟ ଉଦାହରଣ ଥିଲେ ।

୪।ନିଜର କଂପାନୀଙ୍କୁ ଉତ୍ତମରୁ ଶ୍ରେଷ୍ଠତା ଆଡ଼କୁ ନିଅନ୍ତୁ

ଡା. ଭେଙ୍କଟସ୍ୱାମୀ ଉତ୍ତମରୁ ଶ୍ରେଷ୍ଠତାର ଆଦର୍ଶକୁ ସଠିକ୍ ଭାବେ ପ୍ରୟୋଗ କରିଥିଲେ । ସେ ଜାଣିଥିଲେ ଯେ କଂପାନୀ ଭଲ ଲୋକଙ୍କୁ ନେଇ ଗଠିତ ହୋଇଥାଏ । ସେ କର୍ମଚାରୀଙ୍କ ବିକାଶ ଓ ବ୍ୟକ୍ତିତ୍ୱ ଉପରେ ଅଧିକ କେନ୍ଦ୍ରୀଭୂତ କଲେ । ବର୍ତମାନ କର୍ମଚାରୀମାନେ ସେହି ପ୍ରଶିକ୍ଷଣ ଦ୍ୱାରା କାର୍ଯ୍ୟରତ । ସେ ଜୀବନରେ ଏଭଳି କଷ୍ଟକର ସମସ୍ୟାର ସମ୍ମୁଖୀନ ହୋଇଥିଲେ ଯେଉଁଠି ଏକ ଦୃଢ଼ ସକାରାତ୍ମକ ବ୍ୟକ୍ତି ବି ପଛଘୁଞ୍ଚା ଦେଇଥାନ୍ତା, କିନ୍ତୁ ସେ ଏହାକୁ ଦୃଢ଼ତାର ସହକାରେ ସାମ୍ନା କଲେ ଏବଂ ଏହାର ସମାଧାନ କଲେ । କେବଳ ଏହାନୁହେଁ ସେ ପ୍ରଚଣ୍ଡ ଧୈର୍ଯ୍ୟବାନ୍ ଥିଲେ । ସେ ଜାଣିଥିଲେ ତାଙ୍କ ସ୍ୱପ୍ନ ପୂରଣ କରିବା ପାଇଁ ଦୀର୍ଘ ସମୟ ଆବଶ୍ୟକ ଏଣୁ ସେ ହତୋତ୍ସାହ ହୋଇନଥିଲେ । ଏହି ଗୁଣାବଳୀ ତାଙ୍କୁ ତାଙ୍କ କଂପାନୀକୁ ଏକ ଉତ୍କର୍ଷତାର ସ୍ତରକୁ ପହଂଚାଇପାରିଥିଲା ।

୫। ଉଚ୍ଚ ମୂଲ୍ୟବୋଧ ଆପଣଙ୍କ ଭିତ୍ତିଭୂମିକୁ ଦୃଢ଼ତା ପ୍ରଦାନ କରେ

ଡା. ଭେଙ୍କଟସ୍ୱାମୀ ଗୋଟିଏ ମୂଲ୍ୟବୋଧକୁ ବିଶ୍ୱାସ କରୁଥିଲେ, ଯେଉଁ ବ୍ୟକ୍ତି ଆମ ଦ୍ୱାର ନିକଟକୁ ଆସନ୍ତୁନା କାହିଁକି ଉଚିତ ସେବା ପାଇ ଫେରିବେ, ଯଦିଓ ସେମାନଙ୍କ ନିକଟରେ ଅର୍ଥର ଅଭାବ ରହିଥାଏ । ଆମେ କୌଣସି ରାସ୍ତା ବାହାର କରିବା । ଏହି ମାନ୍ୟତା ଦ୍ୱାରା ସେ ତିନିଜଣ ବ୍ୟକ୍ତିଙ୍କ ବଦଳରେ ଜଣେ ବ୍ୟକ୍ତିଠାରୁ ସେବା ନିମନ୍ତେ ଅର୍ଥ ଗ୍ରହଣ କରୁଥିଲେ, ତଥାପି ଏହା ତାଙ୍କ ଅରବିନ୍ଦ ଆଇ କେୟାରକୁ ସ୍ଥାୟୀତ୍ୱ ପ୍ରଦାନ କରିଥିଲା । ଏହା ବ୍ୟତୀତ ତାଙ୍କ ନିକଟରେ ଅନ୍ୟ ଗୁଣାବଳୀ ରହିଥିଲା ଯାହା ତାଙ୍କ ପ୍ରତିଷ୍ଠାର ସ୍ଥାୟୀତ୍ତ୍ଵରେ ସହାୟକ ହୋଇଥିଲା । ପ୍ରଥମତଃ, ସହାନୁଭୂତି, ଯାହା ସମସ୍ତଙ୍କ ନିକଟରେ ଚକ୍ଷୁସେବାରେ ପରିବର୍ତ୍ତିତ କରିଥିଲେ । ଦ୍ୱିତୀୟତଃ, ଗୁଣାତ୍ମକମାନ; ଏହା ଦ୍ୱାରା ସେ ଆଶ୍ଚର୍ଯ୍ୟଜନକ ଗୁଣାତ୍ମକ ବ୍ୟବସ୍ଥାର ନିର୍ମାଣ କରିପାରିଥିଲେ । ତୃତୀୟତଃ, ସ୍ୱଚ୍ଛତା; ଏହା ଚିକିତ୍ସା ସମୟରେ ସୁଲଭତା ପ୍ରଦାନ ଦିଗରେ ପ୍ରୟୋଗ କରିଥିଲେ । ଅନ୍ତିମରେ ସହଭାଗିତା; ଏହା ଦ୍ୱାରା ସେ ଏକ ମୁକ୍ତ କ୍ଷେତ୍ର ପ୍ରସ୍ତୁତ କରି ଲୋକଙ୍କୁ ଅଧିକ ଦିଅନ୍ତୁ, ଅଧିକ ପାଆନ୍ତୁ ବ୍ୟବସ୍ଥା ସଂପର୍କରେ ବୁଝାଇବାରେ ସକ୍ଷମ ହୋଇଥିଲେ । ଏହି ସମସ୍ତ ଅରବିନ୍ଦ ଆଇ କେୟାର୍ କ୍ଷେତ୍ରରେ ବାସ୍ତବରେ ଘଟିଥିଲା ।

୬। ନିଜକୁ ଏକ ବଡ଼ ଖେଳୁଆଡ଼ ବୋଲି ମନେ କରନ୍ତୁ

ଡା. ଭେଙ୍କଟସ୍ୱାମୀ ଏଭଳି ଏକ ବ୍ୟବସାୟିକ ମଡେଲକୁ ଭଲପାଇଥିଲେ ଯାହା ଚକ୍ଷୁସେବା କ୍ଷେତ୍ରରେ ପ୍ରଯୁଯ୍ୟ ନଥିଲା । ମ୍ୟାକ୍ ଡୋନାଲ୍ଡଙ୍କ ବ୍ୟବସାୟିକ ବ୍ୟବସ୍ଥାକୁ ସେ ଗ୍ରହଣ କରିଥିଲେ! ସେ ଏହାକୁ ଭଲ ପାଇଲେ କାରଣ ସେମାନେ ନିଜର ବ୍ୟବସାୟକୁ ସମଗ୍ର ବିଶ୍ୱରେ ପ୍ରସାର କରିପାରିଛନ୍ତି । କେବଳ ଏହାନୁହେଁ ସେମାନଙ୍କ ସାମଗ୍ରୀର ଗୁଣାତ୍ମକମାନର ବୃଦ୍ଧି, ମୂଲ୍ୟଦରରେ ହ୍ରାସ ଏବଂ ସମସ୍ତଙ୍କ ପାଇଁ ସୁଲଭତା ଆଦି ଗୁଣାବଳୀକୁ ମଧ୍ୟ ଗ୍ରହଣ କରିଥିଲେ । ଏହି ସମସ୍ତକୁ ସେ ଚକ୍ଷୁସେବାରେ ପରିବର୍ତ୍ତିତ କରିଥିଲେ । ସେ ଯେତେବେଳେ ମାତ୍ର ୨୦୦ ଡଲାରରେ ଚକ୍ଷୁ ଲେନ୍ସର ପ୍ରତିରୋପଣ ଅସ୍ତ୍ରୋପଚାର କଲେ, ପରବର୍ତ୍ତୀ ସମୟରେ ଏହି ବ୍ୟବସାୟିକ ମଡେଲ୍ ପ୍ରୟୋଗ କରି ଏହାକୁ ୫ଡଲାରକୁ ହ୍ରାସ କରାଇଲେ । ଏହା ଦ୍ୱାରା ଅରବିନ୍ଦ ଆଇ କେୟାାର୍ ବିଶ୍ୱର ୮୫ଟି ଦେଶକୁ ପରିବ୍ୟାପ୍ତ କରିପାରିଥିଲେ ।

(ଏହି ପ୍ରବନ୍ଧ ଜାଗୃତି ଯାତ୍ରା ଅଭିଯାନର ଏକ ଅଂଶବିଶେଷ ...)