ଭାରତୀୟ ବିଜ୍ଞାନ କଂଗ୍ରେସର ସଭାପତି ହେଲେ ଅଚ୍ୟୁତ ସାମନ୍ତ
Wednesday January 06, 2016,
3 min Read
ତରୁଣ ଗୋଷ୍ଠୀଙ୍କ ମଧ୍ୟରେ ବିଜ୍ଞାନର ପ୍ରଚାର କରିବା ଆବଶ୍ୟକ । ସେମାନଙ୍କୁ ଭବିଷ୍ୟତ ଭାରତର ବୈଜ୍ଞାନିକ ସଜାଇବା ଲାଗି ଆମେ ଉଦ୍ୟମ କରିବା ଉଚିତ । ଛାତ୍ରମାନଙ୍କ ମଧ୍ୟରେ ଥିବା ବିଜ୍ଞାନ ଆଗ୍ରହକୁ ତେଜୀୟାନ କରିବାର ସମୟ ଆସିଛି । ଦେଶର ବିକାଶରେ ବିଜ୍ଞାନ ପ୍ରମୁଖ ଭୂମିକା ବହନ କରିବାକୁ ଯାଉଥିବା ବେଳେ ଛାତ୍ରଛାତ୍ରୀମାନଙ୍କୁ ମୌଳିକ ଓ ପ୍ରୟୋଗାତ୍ମକ ବିଜ୍ଞାନ ଶିକ୍ଷା ଦେବା ଜରୁରୀ ।
କେନ୍ଦ୍ର ସରକାରଙ୍କ ବିଜ୍ଞାନ ଓ ପ୍ରଯୁକ୍ତି ବିଭାଗ ଅଧୀନ ଜାତୀୟ ବିଜ୍ଞାନ କଂଗ୍ରେସ ସଂଘ ଅଧିବେଶନର ଦ୍ୱିତୀୟ ଦିନରେ (୪ ଜାନୁଆରି ୨୦୧୬) ଏକ ବିଶାଳ ଛାତ୍ରଗୋଷ୍ଠୀ ଓ ସଂଘ ସଦସ୍ୟମାନଙ୍କୁ ଉଦବୋଧନ ଦେଇ ଏକଥା କହିଛନ୍ତି ଡକ୍ଟର ଅଚ୍ୟୁତ ସାମନ୍ତ ।
ସେ ପୁଣି କହିଛନ୍ତି,
ମୁଁ ଜଣେ ସମାଜବିଜ୍ଞାନୀ ଓ ସବୁବେଳେ ପିଲାଙ୍କ ଗହଣରେ ରହିବାକୁ ଭଲପାଏ । ଓଡ଼ିଶାର ଭୁବନେଶ୍ବରରେ ଥିବା କିଟ୍ ଓ କିସ ରେ ପରିସରରେ ପିଲାଙ୍କ ଗହଣରେ ହିଁ ମୁଁ ବଞ୍ଚୁଛି । ଆମେ ଆଦିବାସୀ ଛାତ୍ରଛାତ୍ରୀଙ୍କ ବିଜ୍ଞାନ ସହ ପରିଚିତ କରାଇବାର ଉଦ୍ୟମ କରି ସଫଳ ହୋଇସାରିଛୁ । ଓଡ଼ିଶାର ଅପହଞ୍ଚ ଆଦିବାସୀ ଇଲାକାରେ ରହୁଥିବା ପିଲାଙ୍କୁ ମୁଖ୍ୟସ୍ରୋତକୁ ଆଣି ବିଜ୍ଞାନ ସହ ପରିଚିତ କରାଇବା ଆମର ଲକ୍ଷ୍ୟ । ଏହି ଆଦିଜନଜାତି ପିଲାମାନଙ୍କୁ ଭବିଷ୍ୟତର ବୈଜ୍ଞାନିକ ଭାବେ ଗଢ଼ିତୋଳିବା ମୋର ମିଶନ୍ ପାଲଟିଯାଇଛି ।
ଦୀର୍ଘ ୫୫ ବର୍ଷର ବ୍ୟବଧାନ ପରେ ଦ୍ୱିତୀୟ ଓଡ଼ିଆ ଭାବେ ଶିକ୍ଷାବିତ, ସମାଜସେବୀ ତଥା କିଟ୍-କିସ୍ ପ୍ରତିଷ୍ଠାତା ଡକ୍ଟର ଅଚ୍ୟୁତ ସାମନ୍ତ ଭାରତୀୟ ବିଜ୍ଞାନ କଂଗ୍ରେସ ସଂଘ(ISCA)ର ସଭାପତି ନିର୍ବାଚିତ ହୋଇଛନ୍ତି । ମହୀଶୂର ଠାରେ ଜାନୁଆରି ୩ରୁ ୭ ତାରିଖ ଯାଏଁ ଚାଲିଥିବା ଭାରତୀୟ ବିଜ୍ଞାନ କଂଗ୍ରେସର ୧୦୩ତମ ଅଧିବେଶନର ତୃତୀୟ ଦିନରେ ଅନୁଷ୍ଠିତ ସଭାପତି ନିର୍ବାଚନରେ ଅଚ୍ୟୁତ ସାମନ୍ତଙ୍କୁ ସର୍ବାଧିକ ସମର୍ଥନ ମିଳିଛି । କାର୍ଯ୍ୟକାରିଣୀ ପରିଷଦର ମୋଟ ୬୮ ଜଣ ସଦସ୍ୟ ମତଦାନ କରିଥିଲେ । ସର୍ବାଧିକ ୪୮ ଭୋଟ ପାଇ ୨୦୧୬-୧୭ ବର୍ଷ ଲାଗି ସଂଘର ସଭାପତି ଭାବେ ନିର୍ବାଚିତ ହୋଇଛନ୍ତି ଶ୍ରୀ ସାମନ୍ତ ।
ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହରୁଙ୍କ ଠାରୁ ଆରମ୍ଭ କରି ପୂର୍ବତନ ରାଷ୍ଟ୍ରପତି ଡକ୍ଟର ଅବଦୁଲ କାଲାମ ଓ ପୂର୍ବତନ ପ୍ରଧାନମନ୍ତ୍ରୀ ଡକ୍ଟର ମନମୋହନ ସିଂହଙ୍କ ଭଳି ବହୁ ପ୍ରତିଷ୍ଠିତ ବ୍ୟକ୍ତିତ୍ୱ ପୂର୍ବରୁ ଆଇଏସ୍ସିଏର ସଭାପତି ପଦ ଅଳଂକୃତ କରି ସାରିଛନ୍ତି । ସଦ୍ୟ ନିର୍ବାଚିତ ଡକ୍ଟର ସାମନ୍ତଙ୍କ ଜନ୍ମର ୫ ବର୍ଷ ପୂର୍ବରୁ ଅର୍ଥାତ ୧୯୬୦ ମସିହାରେ ପ୍ରଥମ ଓଡ଼ିଆ ଭାବେ ପ୍ରସିଦ୍ଧ ବୈଜ୍ଞାନିକ ଡକ୍ଟର ପ୍ରାଣକୃଷ୍ଣ ପରିଜା ଏହି ସମ୍ମାନଜନକ ପଦ ପାଇଁ ନିର୍ବାଚିତ ହୋଇଥିଲେ । ବମ୍ବେରେ ଅନୁଷ୍ଠିତ ୪୭ତମ ବିଜ୍ଞାନ କଂଗ୍ରେସରେ ଡକ୍ଟର ପରିଜାଙ୍କୁ ଏହି ସୁଯୋଗ ମିଳିଥିଲା । ଦୀର୍ଘ ୫୬ ବର୍ଷ ପରେ ୧୦୩ତମ କଂଗ୍ରେସରେ ଆଉ ଜଣେ ଓଡ଼ିଆ ଏହି ପଦ ପାଇଁ ଯୋଗ୍ୟ ବିବେଚିତ ହେବା ଖବର ଓଡ଼ିଶା ପାଇଁ ଗୌରବ ଆଣିଦେଇଛି ।
୨୦୧୧ ମସିହା ଠାରୁ ଡକ୍ଟର ସାମନ୍ତ ସଂଘର କାର୍ଯ୍ୟକାରିଣୀ ପରିଷଦର ସଦସ୍ୟ ଅଛନ୍ତି । ୨୦୧୨ରେ ଭୁବନେଶ୍ୱରରେ କିଟ୍ ବିଶ୍ୱବିଦ୍ୟାଳୟ ପରିସରରେ ୯୯ତମ ଭାରତୀୟ ବିଜ୍ଞାନ କଂଗ୍ରେସକୁ ସଫଳତାର ସହ ଆୟୋଜନ କରି ସେ ଚର୍ଚାକୁ ଆସିଥିଲେ । ଆଇଏସ୍ସିଏର ସଭାପତି ହେବା ପୂର୍ବରୁ ଡକ୍ଟର ସାମନ୍ତ ୧୫ରୁ ଅଧିକ ଗୁରୁତ୍ୱପୂର୍ଣ ଜାତୀୟ ଅନୁଷ୍ଠାନର ସଦସ୍ୟ ରହି ଆସିଛନ୍ତି । ୨୦୦୮ରୁ ୨୦୧୪ ପର୍ଯ୍ୟନ୍ତ ୬ ବର୍ଷ ଧରି ସେ ବିଶ୍ୱବିଦ୍ୟାଳୟ ମଞ୍ଜୁରୀ ଆୟୋଗ(UGC)ର ସଦସ୍ୟ ଥିଲେ । ଏହା ଭିନ୍ନ ସର୍ବଭାରତୀୟ ବୈଷୟିକ ଶିକ୍ଷା ପରିଷଦ(AICTE), ରାଷ୍ଟ୍ରୀୟ ଶିକ୍ଷକ ଶିକ୍ଷା ପରିଷଦ(NCTE), ଜାତୀୟ କତା ବୋର୍ଡ, ଜନ ଯୋଜନା ଓ ଗ୍ରାମୀଣ ପ୍ରଯୁକ୍ତି ବିକାଶ ପରିଷଦ(CAPART) ଆଦିର ସଦସ୍ୟ ରହିବା ସହ ଡକ୍ଟର ସାମନ୍ତ ଦୁଇଟି କେନ୍ଦ୍ରୀୟ ବିଶ୍ୱବିଦ୍ୟାଳୟର ମଧ୍ୟ ଶିକ୍ଷା ପରିଷଦ ସଦସ୍ୟ ରହିଛନ୍ତି ।
ଭୁବନେଶ୍ୱରରେ କିଟ୍ ବିଶ୍ୱବିଦ୍ୟାଳୟ ପ୍ରତିଷ୍ଠା କରିବା ସହ ଏହାର ପ୍ରଥମ କୁଳପତି ଥିଲେ ଡକ୍ଟର ସାମନ୍ତ । କିସ୍ ଭଳି ଏକ ଅଭିନବ ବିଦ୍ୟାଳୟ ପ୍ରତିଷ୍ଠା କରି ୨୫ ହଜାର ଗରିବ ଆଦିବାସୀ ଛାତ୍ରଙ୍କୁ ମାଗଣା ଶିକ୍ଷା, ଖାଦ୍ୟ, ବାସଗୃହ, ସ୍ବାସ୍ଥ୍ୟସେବା ଓ ଅନ୍ୟାନ୍ୟ ଆନୁଷଙ୍ଗିକ ସେବା ଯୋଗାଇବାର ମହାର୍ଘ କାର୍ଯ୍ୟ ପାଇଁ ବିଶ୍ୱବ୍ୟାପୀ ପ୍ରସିଦ୍ଧି ସାଉଁଟିଛନ୍ତି ଡକ୍ଟର ସାମନ୍ତ । ଭାରତ, ୟୁକେ ଓ ସ୍ବେଡେନରେ କିଟ୍ ଫାଉଣ୍ଡେସନ୍ ପ୍ରତିଷ୍ଠା କରି ସମାଜସେବା କ୍ଷେତ୍ରରେ ସେ ନୂଆ କିର୍ତୀମାନ ସ୍ଥାପନ କରିଛନ୍ତି । କାଦମ୍ବିନୀ ଓ କୁନିକଥା ଭଳି ଦୁଇଟି ସମ୍ଭ୍ରାନ୍ତ ଓଡ଼ିଆ ପତ୍ରିକାର ପ୍ରତିଷ୍ଠାତା ହେଉଛନ୍ତି ଡକ୍ଟର ସାମନ୍ତ । ସେ ଭାରତର ଏକମାତ୍ର ଲିଟଲ୍ ମିସ୍ ଇଣ୍ଡିଆ ପ୍ରତିଯୋଗିତା ଭାବେ ପରିଚିତ ନହ୍ନିପରୀ ଜାତୀୟ କିଶୋରୀ ସୁନ୍ଦରୀ ପ୍ରତିଯୋଗିତା ଆୟୋଜନ କରାଉଛନ୍ତି ।
ଦେଶର ସର୍ବପୁରାତନ ସଂଘ ଜାତୀୟ ବିଜ୍ଞାନ କଂଗ୍ରେସ ସଂଘର ସଭାପତି ହେବା ପରେ ନିଜର ଖୁସି ବ୍ୟକ୍ତ କରିବା ସହ ଶ୍ରୀ ସାମନ୍ତ ଓଡ଼ିଶାର ଶିକ୍ଷା ଓ ବିଜ୍ଞାନ ବିକାଶ ଦିଗରେ ଅଧିକ କାର୍ଯ୍ୟ କରିବାର ସୁଯୋଗ ମିଳିଛି ବୋଲି କହିଛନ୍ତି ।
ଲେଖକ ଶୁଭ୍ରାଂଶୁ ପଣ୍ଡା ଜଣେ ସାହିତ୍ୟିକ ଓ ସାମ୍ବାଦିକ ଭାବେ ଜଣାଶୁଣା । ତାଙ୍କୁ +91 9338655845 କିମ୍ବା [email protected] ରେ ଯୋଗାଯୋଗ କରାଯାଇ ପାରିବ।