ଓଡ଼ିଶାରେ ମଧ୍ୟାହ୍ନ ଭୋଜନ ଯୋଜନା: ସାମିଲ ହେଲା ମୋବାଇଲ୍ କଂପାନି ଆଇଡିଆ

0

ଆଦିତ୍ୟ ବିର୍ଲା ଗ୍ରୁପର ଦୂର ସଂଚାର କଂପାନି ଆଇଡିଆ ଓଡ଼ିଶାରେ ଅକ୍ଷୟ ପାତ୍ର ଫାଉଣ୍ଡେସନ୍ ସହ ମିଶି ବିଦ୍ୟାର୍ଥୀଙ୍କୁ ମଧ୍ୟାହ୍ନ ଭୋଜନ ପ୍ରଦାନ କରିବ । ନିକଟରେ କଂପାନି ପକ୍ଷରୁ ଅକ୍ଷୟ ପାତ୍ର ଫାଉଣ୍ଡେସନ୍ ସହ ବୁଝାମଣା ସ୍ୱାକ୍ଷର କରାଯାଇଥିଲା । ରାଜ୍ୟର ୧୦ଟି ସ୍ଥାନରେ ଥିବା ୬୨୫ଟି ସ୍କୁଲର ୪୭ ହଜାର ଛାତ୍ରଛାତ୍ରୀ ଏହା ଦ୍ୱାରା ଲାଭବାନ ହେବେ । ପ୍ରାରମ୍ଭରେ ଏହି ଅଭିଯାନ ପାଇଁ ପୁରୀ ଓ କଟକର ଦୁଇଟି ସ୍କୁଲକୁ ଚିହ୍ନଟ କରାଯାଇଛି । ଏହି ଅଭିଯାନର ମୂଳ ଉଦ୍ଧେଶ୍ୟ ହେଉଛି ପ୍ରତିଦିନ ଛାତ୍ରଛାତ୍ରୀଙ୍କୁ ପୋଷଣଯୁକ୍ତ ଖାଦ୍ୟ ପ୍ରଦାନ କରିବା ଯଦ୍ୱାରା ସେମାନେ ପ୍ରତି ଦିନ ସ୍କୁଲ ଆସିପାରିବେ । ଏହା କ୍ଷୁଧା ଦୂରୀକରଣରେ ସହାୟକ ହେବା ସହ ଶିଶୁମାନଙ୍କ ସାମଗ୍ରିକ ବିକାଶ ପାଇଁ ଦରକାର ପୋଷଣ ଯୋଗାଇ ଦେବ ।

ଆଇଡିଆ ଟିମ୍ ପକ୍ଷରୁ ଦୁଇଟି ସ୍ୱତନ୍ତ୍ର କାର୍ଯ୍ୟକ୍ରମ ଆୟୋଜନ କରି ଏହି ଅଭିଯାନକୁ ପୁରୀ ଜିଲ୍ଲାର ବିଜୟରାମଚନ୍ଦ୍ରପୁର ୟୁଜିୟୁପି ସ୍କୁଲ ଓ କଟକ ଜିଲ୍ଲାର ଖାନନଗର ନୋଡାଲ୍ ୟୁପି ଆରମ୍ଭ କରାଯାଇଛି । ଏହି କାର୍ଯ୍ୟକ୍ରମଗୁଡ଼ିକରେ କେବଳ ଛାତ୍ରଛାତ୍ରୀ ନୁହନ୍ତି ଶିକ୍ଷକ ଶିକ୍ଷୟିତ୍ରୀମାନେ ମଧ୍ୟ ପ୍ରବଳ ଉତ୍ସାହର ସହ ଯୋଗ ଦେଇଥିଲେ ।

ଆଇଡିଆର ଓଡ଼ିଶା ସର୍କଲ୍ ମୁଖ୍ୟ ସୋମେଶ୍ୱର ରାଓ କହିଛନ୍ତି ଯେ, ଗ୍ରାମୀଣ ଅଂଚଳରେ ଯେଉଁଠାରେ ପିଲାମାନେ ଦିନକୁ ଥରେ ଖାଇବାକୁ ପାଉ ନାହାନ୍ତି ସେମାନଙ୍କୁ ପୋଷଣଯୁକ୍ତ ଖାଦ୍ୟ ପ୍ରଦାନ କରିବା ସହ ମୌଳିକ ଶିକ୍ଷା ପ୍ରଦାନ କରି ସେମାନଙ୍କ କ୍ୟାରିଅର ସଜାଡ଼ିବା ଓ ଫିଟନେସ୍ ଓ ସ୍ୱାସ୍ଥ୍ୟ ରକ୍ଷା ଜରିଆରେ ମୌଳିକ ମୂଲ୍ୟବୋଧ ଆଗକୁ ବଢ଼ାଇବା ଭଳି ଚ୍ୟାଲେଞ୍ଜ ଗ୍ରହଣ କରିବା ନିଶ୍ଚିତ ପକ୍ଷେ ପ୍ରଶଂସାଯୋଗ୍ୟ । ଏକ ଦାୟିତ୍ୱବାନ କର୍ପୋରେଟ୍ ନାଗରିକ ଭାବେ ଆମ ଗ୍ରୁପ୍ ସମାଜକୁ ଫେରାଇବା ଉପରେ ବିଶ୍ୱାସ ରଖେ ଓ ସିଏସଆର୍ କାମର ଅଂଶ ସ୍ୱରୂପ , ଆମେ ଆରମ୍ଭରେ ଦୁଇଟି ସ୍କୁଲରୁ ଏହି ଅଭିଯାନ ଆରମ୍ଭ କରୁଛୁ । ମୁଁ ନିଶ୍ଚିତ ଯେ ଏହା ଆମ ପାଇଁ ଏକ ଶ୍ରେଷ୍ଠ କାହାଣୀ ହେବ ଓ ଭବିଷ୍ୟତରେ ଏହି ଧାରା ଜାରି ରହିବ ।

ସୁଜାତା ମିଶ୍ର, ପ୍ରଧାନ ଶିକ୍ଷୟିତ୍ରୀ, ବିଜୟରାମଚନ୍ଦ୍ରପୁର ୟୁଜିୟୁପି ସ୍କୁଲ, ପୁରୀ କହିଛନ୍ତି ଯେ, ଆଇଡିଆ କଂପାନିର ଏହି ପଦକ୍ଷେପ ନିଶ୍ଚିତପକ୍ଷେ ସ୍ୱାଗତଯୋଗ୍ୟ । ଆମେ ଖୁସି ଯେ କଂପାନି ଏଥିପାଇଁ ଆମ ସ୍କୁଲକୁ ଚୟନ କରିଛି । ଆଇଡିଆ ଟିମ୍ ପକ୍ଷରୁ ପିଲାମାନଙ୍କ ସହ ମିଶି ଗୋଟିଏ ଦିନ ବିଭିନ୍ନ କାର୍ଯ୍ୟକ୍ରମ କରାଯାଇଥିଲା । ଚିତ୍ରାଙ୍କନ ପ୍ରତିଯୋଗିତା ପାଇଁ ଉପକରଣ ହାସଲ କରି ଛାତ୍ରଛାତ୍ରୀମାନେ ବେଶ ଖୁସି ଅଛନ୍ତି । ସେମାନେ ରଙ୍ଗରେ ସେହିଦିନିକିଆ କାର୍ଯ୍ୟକ୍ରମରେ ନିଜର ଚପଳ ଖୁସିକୁ ବ୍ୟକ୍ତ କରିଥିଲେ । ମୁଁ ନିଶ୍ଚିତ ଯେ ଏହା ଅନ୍ୟ ପିଲାମାନଙ୍କୁ ଅନୁପ୍ରାଣିତ କରିବ ।

ରବିନ୍ଦ୍ରନାଥ ରାଉତରାୟ, ପ୍ରଧାନ ଶିକ୍ଷକ, ଖାନନଗର ନୋଡାଲ୍ ୟୁପି ସ୍କୁଲ, କଟକ କହିଛନ୍ତି ଯେ, ଆଇଡିଆ ଟିମ୍ ଦ୍ୱାରା ବହୁତ ଭଲ କାର୍ଯ୍ୟକ୍ରମ ଆୟୋଜନ କରାଯାଇଥିଲା । ବିଶେଷ କରି ଚିତ୍ରାଙ୍କନ ପ୍ରତିଯୋଗିତା ଓ ପିଲାମାନଙ୍କ ସହ ମିଶି ଯେଉଁ କାର୍ଯ୍ୟକ୍ରମଗୁଡ଼ିକୁ ଆୟୋଜନ କରାଯାଇଥିଲା ତାହା ସମସ୍ତ ଷ୍ଟାଫଙ୍କ ଦ୍ୱାରା ପ୍ରଶଂସାଯୋଗ୍ୟ ହୋଇଥିଲା । ପିଲାମାନେ ଏଭଳି କାର୍ଯ୍ୟକ୍ରମ ଓ ଉପହାର ପାଇ ବେଶ ଖୁସି ହୋଇଥିଲେ ।