ସୁନ୍ଦର ପିଛାଇଙ୍କ କାହାଣୀ: ଘରେ ନ ଥିଲା ଟିଭି, ଆଜି ଗୁଗୁଲର ସିଇଓ
By Pravat Pattnaik
Friday December 18, 2015,
2 min Read
ଗୁଗୁଲର ସିଇଓ ଭାବେ ନିଯୁକ୍ତ ହୋଇଥିବା ଚେନ୍ନାଇ ଜନ୍ମିତ ସୁନ୍ଦର ପିଛାଇଙ୍କ କାହାଣୀ ବଲିଉଡ୍ ସିନେମା ଭଳି ରୋମାଂଚକର । ଏକ ସାଧାରଣ ପରିବାରରେ ଜନ୍ମ ଗ୍ରହଣ କରିଥିବା ଏକ ବାଳକ ନିଜର କଠିନ ପରିଶ୍ରମ ଓ ବିଚକ୍ଷଣ ବୁଦ୍ଧିମତା ବଳରେ ଆଜି ବିଶ୍ୱର ସବୁଠୁ ସଫଳ କଂପାନିର ସିଇଓ ଭାବେ ଅବସ୍ଥାପିତ ହୋଇଛି ।
ତାମିଲନାଡୁର ରାଜଧାନୀ ଚେନ୍ନାଇରେ ସୁନ୍ଦର ଜନ୍ମ ଗ୍ରହଣ କରିଥିଲେ । ଯେତେବେଳେ ସୁନ୍ଦରଙ୍କ ପିତାମାତାଙ୍କ କୌଣସି ସନ୍ତାନ ଜନ୍ମ ହୋଇ ନଥିଲେ ସେତେବେଳେ ତାଙ୍କ ମା ଜଣେ ଷ୍ଟେନୋଗ୍ରାଫର୍ ଭାବେ କାର୍ଯ୍ୟ କରୁଥିଲେ। ତାଙ୍କ ବାପା ରଘୁନାଥ ପିଛାଇ ଇଞ୍ଜିନିୟର ଥିଲେ । କିଛି ଦିନ ପରେ ସେ ନିଜର ଏକ କାରଖାନା ଖୋଲି ସେଥିରେ ବୈଦ୍ୟୁତିକ ଉପକରଣ ନିର୍ମାଣ କରିବା ଆରମ୍ଭ କରିଥିଲେ ।
ସୁନ୍ଦରଙ୍କ ବାପା କହିଛନ୍ତି ଯେ, ସେ କାରଖାନାରୁ କାମ ସାରି ଘରକୁ ଆସିବା ପୁଅ (ସୁନ୍ଦର) ସହ କାରଖାନାରେ କିଭଳି କାର୍ଯ୍ୟ ହେଉଛି ଓ କଣ ସବୁ ସମସ୍ୟା ସାମ୍ନା କରିବାକୁ ପଡୁଛି ତାହା ଆଲୋଚନା କରୁଥିଲେ । ସେହି ସବୁ କଥାକୁ ସୁନ୍ଦର ବହୁତ ଆଗ୍ରହର ସହ ଶୁଣୁଥିଲେ । ସେହିଦିନଠାରୁ ସୁନ୍ଦର ଟେକ୍ନୋଲୋଜି ପ୍ରତି ଆକର୍ଷିତ ହୋଇଥିଲେ । ତାଙ୍କ ପରିବାରରେ ଥିବା ଚାରି ଜଣ ସଦସ୍ୟ । ଏକ ଦୁଇ କୋଠରି ବିଶିଷ୍ଟ ଆପାର୍ଟମେଣ୍ଟରେ ସେମାନେ ରହୁଥିଲେ । ସୁନ୍ଦର ନିଜ ସାନ ଭାଇ ସହ ଗୋଟିଏ କୋଠରୀରେ ଶୋଉଥିଲେ ।
ଯେତେବେଳେ ଦୁଇ ଭାଇ ଛୋଟ ଥିଲେ ସେତେବେଳେ ତାଙ୍କ ଘରେ ଟିଭି ଖଣ୍ଡିଏ ନ ଥିଲା । ଯାତାୟାତ ପାଇଁଁ ତାଙ୍କ ପରିବାର ପାଖରେ ଥିଲା ଦୁଇଟି ବିକଳ୍ପ । ଗୋଟିଏ ହେଉଛି ସହରରେ ଚାଲୁଥିବା ସିଟି ବସ୍ ଓ ଦ୍ୱିତୀୟଟି ହେଉଛି ନିଜ ସ୍କୁଟର । ବେଳେବେଳେ ପୁରା ପରିବାର ସେହି ସ୍କୁଟରରେ ବୁଲିବାକୁ ବାହାରି ଯାଉଥିଲେ ।
ଯେତେବେଳେ ସୁନ୍ଦରଙ୍କୁ ବାର ବର୍ଷ ହୋଇଥିଲା ତାଙ୍କ ଘରକୁ ଟେଲିଫୋନ ସଂଯୋଗ ଆସିଲା । ଟେଲିଫୋନକୁ ନେଇ ସେ ବହୁତ ଉତ୍ସାହିତ ଥିଲେ । ସେ ଯେଉଁ ନମ୍ବର ଡାଏଲ୍ କରୁଥିଲେ ତାହାକୁ ମନେ ରଖି ଦେଉଥିଲେ । ଯଦି ଘରେ କେହି ସଦସ୍ୟ କୌଣସି ନମ୍ବର ଭୁଲି ଯାଉଥିଲେ ସେ ବିଷୟରେ ସୁନ୍ଦରଙ୍କୁ ପଚାରୁଥିଲେ ।
ସୁନ୍ଦରଙ୍କ ସ୍ମରଣ ଶକ୍ତି ବିଷୟରେ ଗୁଗୁ୍ଲର ଅଧିକାରୀମାନେ ମଧ୍ୟ ଜାଣିଥିଲେ ।
ସ୍କୁଲରେ ପଢ଼ୁଥିବା ବେଳେ ସୁନ୍ଦର କ୍ରିକେଟ୍ ଟିମର ଅଧିନାୟକ ଥିଲେ । ଆଇଆଇଟି ଖଡ଼ଗପୁରରୁ ସେ ଇଞ୍ଜିନିୟରିଂ ସ୍ନାତକ ଡିଗ୍ରି ହାସଲ କରିଥିଲେ । ଆମେରିକାର ଷ୍ଟାନଫୋର୍ଡ ବିଶ୍ୱବିଦ୍ୟାଳୟରେ ସେ ବିଜ୍ଞାନରେ ସ୍ନାତକୋତର ଓ ୟୁନିଭର୍ସିଟି ଅଫ୍ ପେନ୍ସିଲିଭାନିଆରେ ଏମବିଏ ପାଠ ପଢ଼ିଥିଲେ ।
ପାଠ ଶେଷ ହେବା ପରେ ସେ ମାକିନ୍ସେ ଆଣ୍ଡ କଂପାନିରେ ଯୋଗ ଦେଇଥିଲେ । ୨୦୦୪ରେ ସେ ଗୁଗୁଲରେ ଯୋଗ ଦେଇଥିଲେ । କ୍ରୋମ୍ ବ୍ରାଉଜର୍ ବିକଶିତ କରିବାରେ ତାଙ୍କର ପ୍ରମୁଖ ଭୂମିକା ଥିଲା । ନିକଟରେ ତାଙ୍କୁ ଆଣ୍ଡ୍ରଏଡ୍ ବିଭାଗର ମୁଖ୍ୟ କରାଯାଇଥିଲା । ୨୦୧୧ରେ ସୁନ୍ଦରଙ୍କୁ ନେବାକୁ ଟ୍ୱିଟର୍ ପକ୍ଷରୁ ଉଦ୍ୟମ କରାଯାଇଥିଲା । ଷ୍ଟିଭ୍ ବାଲମରଙ୍କ ଅବସର ପରେ ମାଇକ୍ରୋସଫ୍ଟର ମୁଖ୍ୟ ଭାବେ ସୁନ୍ଦରଙ୍କୁ ନିଯୁକ୍ତି ମିଳିବ ବୋଲି ସେହି ସମୟରେ ଚର୍ଚ୍ଚା ହୋଇଥିଲା ।
ଭାରତକୁ ଗର୍ବିତ କରିଥିବା ୧୫ ଭାରତୀୟ
୧-ସତ୍ୟ ନାଡେଲା-ମାଇକ୍ରୋସଫ୍ଟ ସିଇଓ
୨-ସୁନ୍ଦର ପିଛାଇ -ଗୁଗୁଲ ସିଇଓ
୩-ଇନ୍ଦିରା ନୁୟୀ-ପେପ୍ସି ସିଇଓ
୪-ସଞ୍ଜୟ କୁମାର ଝା- ଗ୍ଲୋବାଲ୍ ଫାଉଣ୍ଡ୍ରିଜ୍ ସିଇଓ
୫-ସାନ୍ତନୁ ନାରାୟେନ- ଆଡୋବ୍ ସିଇଓ
୬-ଅଜୟପାଲ୍ ସିଂହ ବାଙ୍ଗା- ମାଷ୍ଟର୍ କାର୍ଡ ସିଇଓ
୭-ଏଲ୍ ଏନ୍ ମିତଲ- ଆର୍ସେଲର ମିତଲ ସିଇଓ
୮-ହରିଷ ମନୱାନି- ୟୁନିଲିଭର୍ ସିଇଓ
୯-ନିକେଶ ଅରୋରା- ସଫ୍ଟବ୍ୟାଙ୍କ ସିଇଓ
୧୦-ଫ୍ରାନ୍ସିସ୍କୋ ଡିସୁଜା- କଗ୍ନିଜାଂଟ ସିଇଓ
୧୧-ରାକେଶ କପୁର- ରେକିଟ୍ ବେନକାଇଜର୍ ସିଇଓ
୧୨-ନୀତିନ ପରାଞ୍ଜପେ- ୟୁନିଲିଭର୍ ହୋମ୍ କେୟାର
୧୩-ଅତୁଲ ସିଂହ- କୋକାକୋଲା ଏସିଆ ମୁଖ୍ୟ
୧୪-ୟୀୟୂଷ ଗୁପ୍ତା- ଡିବିଏସ୍ ବ୍ୟାଙ୍କ ସିଇଓ
୧୫-ରାଜୀବ ବାସୁଦେବ- ଏଗନ୍ ଜେହେନ୍ଦର ସିଇଓ