ସମୁଦ୍ରର ସ୍ରୋତକୁ ଜିତିଥିବା ଝିଅ ‘ଭକ୍ତି’
Thursday November 12, 2015,
5 min Read
ଯେଉଁ ବୟସରେ ପିଲାମାନେ ଠିକ ଭାବେ ଚାଲି ମଧ୍ୟ ପାରନ୍ତି ନାହିଁ, ସେ ବୟସରେ ପାଣିରେ ପହଁରିବା ଆରମ୍ଭ କରିଥିଲେ ଭକ୍ତି ଶର୍ମା । ପହଁରିବା ଥିଲା ତାଙ୍କ ଜୀବନ । ୫ରୁ ୬ ଡିଗ୍ରୀର ଥଣ୍ଡା ଓ ଅସମ୍ଭାଳ ଶୀତରେ ସେ ସନ୍ତରଣ ଅଭ୍ୟାସ ଜାରି ରଖିଥିଲେ । ତାଙ୍କର ଏହି ନିଶା ଯୋଗୁ ସନ୍ତରଣରେ ସେ ବହୁ ରେକର୍ଡ କରିଛନ୍ତି । ସ୍ୱିମିଂ ପୁଲ୍ ଠାରୁ ନେଇ ନଦୀ, ସମୁଦ୍ର ଓ ମହାସାଗର ଯାଏ, ସବୁଠି ସେ ଗଭୀର ଜଳରାଶିର ପ୍ରଚଣ୍ଡ ସ୍ରୋତକୁ ଏଡାଇ ବିଜୟୀ ହୋଇଛନ୍ତି। ବିଶ୍ୱର ସବୁଠୁ କନିଷ୍ଠ ଓ ଏସିଆ ମହାଦେଶରୁ ପ୍ରଥମ ମହିଳା ଭାବେ ସେ ଆଣଟର୍କାଟିକା ମହାସାଗରରେ (Open water swim) ରେ ରେକର୍ଡ କରିଛନ୍ତି । ଏହାଛଡା ସେ ୪ଟି ମହାସାଗରରେ ସନ୍ତରଣ କରିବା ସହ ୮ଟି ସମୁଦ୍ର ଓ ପ୍ରଣାଳୀରେ (seas and channels )ରେ ସନ୍ତରଣ ସମ୍ପୂର୍ଣ୍ଣ କରିସାରିଛନ୍ତି।
ଭକ୍ତି ମୁମ୍ବାଇରେ ଜନ୍ମ ହୋଇଥିଲେ ବି ରାଜସ୍ଥାନର ଉଦୟପୁରରେ ରହୁଥିଲେ । ଭକ୍ତିଙ୍କ ମା ବି ଜଣେ ଜାତୀୟ ସ୍ତରର ସନ୍ତରଣକାରୀ ଥିଲେ । ଭକ୍ତିଙ୍କୁ ଅଢେଇ ବର୍ଷ ବୟସରୁ ତାଙ୍କ ମା ପ୍ରଶିକ୍ଷଣ ଦେଉଥିଲେ । ଏ ବିଷୟରେ ସେ କୁହନ୍ତି, ଆରମ୍ଭରୁ ମୋତେ ସାମାନ୍ୟ ଡର ଲାଗୁଥିଲା । କିନ୍ତୁ ଏତେ କମ୍ ବୟୟରୁ ପହଁରା ଶିଖିବା ଯୋଗୁ ଭବିଷ୍ୟତ ପାଇଁ ଏହା ମୋତେ ସାହାର୍ଯ୍ୟ କରିଥିଲା । ହେଲେ ସବୁ କିଛି ଏତେ ସହଜ ନଥିଲା । ଭକ୍ତି ରହୁଥିବା ସ୍ଥାନର ଆଖପାଖରେ ଭଲ ସ୍ୱିମିଂ ପୁଲ୍ ଅଭାବ ଥିଲା । ଏହାସହ ଜଣେ ମହିଳା ସନ୍ତରଣକାରୀ ହୋଇଥିବାରୁ ବଡ ହେଉଥିବାରୁ ସେ ବହୁ ସାମାଜିକ ପ୍ରତିବନ୍ଧକ ସାମ୍ନା କରୁଥିଲେ । ଏମିତି ସବୁ କାରଣ ପାଇଁ ସେ ସନ୍ତରଣ ଚାଲୁ ରଖି ପାରିଲେନି । ଶେଷରେ ସେ ଏହାକୁ ଛାଡି ଦେଇଥିଲେ । ପରେ ସେ କରାଟେ ଖେଳିବା ଆରମ୍ଭ କଲେ । ଏଥିରେ ବ୍ଲାକବେଲ୍ଟ ପାଇବା ପାଇଁ ସେ ପ୍ରଶିକ୍ଷଣ ନେଲେ । ମାତ୍ର ଏଥିରେ ବି ତାଙ୍କ ପାଇଁ ସମସ୍ୟା ଆସିଥିଲା । ତାଙ୍କୁ ପ୍ରଶିକ୍ଷଣ ଦେଉଥିବା ପ୍ରଶିକ୍ଷକ ସେହି ସ୍ଥାନ ଛାଡି ନିଜ ସହରକୁ ପଳାଇଥିଲେ । ଏଥିପାଇଁ ଏହି ଖେଳ ବି ସେ ଚାଲୁ କରିପାରିନଥିଲେ ।
"ଯଦି କିଛି କରୁଛ, ଶତ ପ୍ରତିଶତ ମନ ଦେଇ କର, ନ ହେଲେ ଏହାକୁ କରନି," ଭକ୍ତିଙ୍କ ମା ତାଙ୍କୁ ପରାମର୍ଶ ଦେଇଥିଲେ । ଏହା ପରେ ସେ ପୁଣି ଥରେ ନିଜ ପ୍ରିୟ ସନ୍ତରଣକୁ ଫେରିଲେ । କଠିନ ପରିଶ୍ରମ ଓ ପ୍ରଶିକ୍ଷଣ ପରେ ସେ ରାଜ୍ୟ ଓ ଜାତୀୟ ସ୍ତରର ପ୍ରତିଯୋଗିତାରେ ଭାଗ ନେଲେ । ତେବେ ସନ୍ତରଣରେ ଅଧିକ ସମୟ ଦେଉଥିବାରୁ ନିଜ ପଢା ପ୍ରତି ଆବଶ୍ୟକ ସମୟ ଦେଇ ପାରୁନଥିଲେ । ହେଲେ ଆଶ୍ଚର୍ଯ୍ୟଜନକ ଭାବେ ସେ ଦଶମରେ ୮୪% ଓ ଦ୍ୱାଦଶରେ ୮୬ % ନମ୍ବର ରଖିବାରେ ସଫଳ ହୋଇଥିଲେ । ଏକା ସମୟରେ ସନ୍ତରଣ ଓ ପଢାକୁ ସମୟ ଦେବା ମୁସ୍କିଲ ହେଉଥିଲା । ଦିନକୁ ୫ ଘଣ୍ଟା ସମୟ ଟ୍ରେନିଂରେ ଯାଉଥିଲା । ଏଥିପାଇଁ ସନ୍ତରଣ ଯୋଗୁ ପଢା ପ୍ରଭାବିତ ହେଉଛି ବୋଲି କହିବା ଖାଲି ବାହାନା ନୁହେଁ ସତ ଥିଲା ବୋଲି ସେ କୁହନ୍ତି ।
ବହୁ ପ୍ରତିଯୋଗିତାରେ ସେ ସବୁଠୁ କନିଷ୍ଠ ଭାବେ ଭାଗ ନେଇ ପ୍ରଥମ ହେଉଥିଲେ । ସେ ଏକ ପ୍ରତିଯୋଗିତା ସମୟର କୈାତୂହଳ ଘଟଣା ମନେ ପକାଇ କୁହନ୍ତି, “ଜିଲ୍ଲାସ୍ତରରେ ପ୍ରଥମ ହୋଇ ମୁଁ ରାଜ୍ୟସ୍ତରର ପ୍ରତିଯୋଗିତାରେ ଖେଳିବାକୁ ଯୋଗ୍ୟତା ହାସଲ କରିଥାଏ । ପ୍ରତିଯୋଗିତା ଆରମ୍ଭ ହେବାକୁ ଅପେକ୍ଷା କରି ମା’ଙ୍କ ସହ ଛିଡା ହୋଇଥାଏ । ସେତେବେଳେ ମୋତେ ମାତ୍ର ୮ବର୍ଷ ହୋଇଥିଲା ଓ ମୋ ଆଗରେ ୨୦୦ମିଟର ଇଭେଟଂ ଅତିକ୍ରମ କରିବା ଲକ୍ଷ୍ୟ ଥାଏ । ଠିକ୍ ସେହି ସମୟରେ ଟାଇମ କୀପର (timekeeper) ମୋତେ ଚାହିଁଲେ ଆଉ ମା ଙ୍କୁ ପଚାରିଲେ, ଇଏ କଣ ଟାର୍ଗେଟ ଛୁଇଁପାରିବ । ତେବେ ମୁଁ ଏହି ଟାର୍ଗେଟକୁ ଅତିକ୍ରମ କରି ଇଭେଟଂ ଜିତି ନେଇଥିଲି” ।
ଓପନ୍ ୱାଟର ସ୍ୱିମ୍ (open water swim)
ଭକ୍ତି ୧୪ ବର୍ଷ ବୟସ ବେଳୁ ଓପନ ୱାଟର ସ୍ୱିମ୍ କରିବାକୁ ସାହସ ଜୁଟାଇଲେ । ମାଙ୍କ ପରାମର୍ଶ ଅନୁସାରେ ସେ ଉରାନ ପୋର୍ଟରୁ ଗେଟ୍ ୱେ ଅଫ୍ ଇଣ୍ଡିଆ ପର୍ଯ୍ୟନ୍ତ ହେଉଥିବା ସମୁଦ୍ରର ଲମ୍ବା ଦୂରତାର ସନ୍ତରଣରେ ଭାଗ ନେଲେ। ପରେ ସେ ଏହି ଲମ୍ବା ଦୂରତାର ସନ୍ତରଣରେ ଅଧିକରୁ ଅଧିକ ଅଭ୍ୟାସ କରିଥିଲେ । ସେ ଶୀତଦିନେ ସନ୍ତରଣ ଅଭ୍ୟାସ ଜୋର୍ କଲେ । ୫ରୁ ୬ ଡିଗ୍ରୀର ଅସମ୍ଭାାଳ ଥଣ୍ଡାରେ ସେ ପ୍ରଶିକ୍ଷଣ ଜାରି ରଖିଲେ । ଏ ବାବଦରେ ଭକ୍ତି କୁହନ୍ତି, "ଅଭ୍ୟାସ କରୁଥିବା ସ୍ୱିମିଂ ପୁଲ୍ କର୍ତ୍ତୃପକ୍ଷ ମୋତେ ଶୀତଦିନେ ଅଭ୍ୟାସ କରିବାକୁ ଅନୁମତି ଦେଲେ । ମୁଁ ମୋ ମାଁଙ୍କ ସହ ସେଠାକୁ ଅଭ୍ୟାସ ପାଇଁ ଗଲା ବେଳେ ପୂରା କ୍ୟାମ୍ପସରେ କେବଳ ଆମେ ଦୁଇ ଜଣ ହିଁ ଥାଉ । ଏମିତି ଦିନରେ ୩ରୁ ୪ ଘଣ୍ଟା ଅନବରତ ଅଭ୍ୟାସ କଲି । ତେବେ ଯେଉଁମାନେ ପ୍ରଫେସନାଲ ଟ୍ରେନିଂ ବିନା ସନ୍ତରଣ କରନ୍ତି ସେମାନଙ୍କ ପାଇଁ ଚ୍ୟାଲେଞ୍ଜ ଅଧିକ ହୋଇଥାଏ । ଏଠି ତୁମେ ନିଜେ ହିଁ ନିଜ ପାଇଁ ସବୁଠୁ ବଡ ପ୍ରେରଣା ହୋଇଥାଅ,"।
ଭକ୍ତିଙ୍କ ପାଇଁ ତାଙ୍କ ସନ୍ତରଣ ଯାତ୍ରା ବହୁ ଚ୍ୟାଲେଞ୍ଜ ଓ କଷ୍ଟ ଥିଲା । ସେ ବହୁବାର ବିଫଳ ହୋଇ ପ୍ରତିକୂଳତା ବିରୋଧରେ ଛିଡା ହେବାକୁ ସକ୍ଷମ ହୋଇଥିଲେ । ନିଜ ଅନୁଭୂତିରୁ ସେ କୁହନ୍ତି, “ପ୍ରତିଯୋଗିତାମୂଳକ ସନ୍ତରଣରେ ଭାଗ ନେବାକୁ ବହୁ ସମୟ ଯାଉଥିଲା । ଏତେ ସମୟ ଦେବା ପରେ ବି ମହାରାଷ୍ଟ୍ର ଓ ଦକ୍ଷିଣ ଭାରତରୁ ଆସୁଥିବା ପ୍ରତିଯୋଗୀଙ୍କ ସମକକ୍ଷ ହୋଇପାରୁନଥିଲି । ଏଥିପାଇଁ ବିଫଳ ହୋଇଛି ବୋଲି ମନେ ହେଉଥିଲା । ଏଥିରେ ଭାଙ୍ଗି ନ ପଡି ନିଜ କ୍ଷମତା ବଢାଇବାକୁ ଚେଷ୍ଟା ଜାରି ରଖିଲି ।”
ଲଗାତାର ଅଭ୍ୟାସ ଓ ଦୃଢ ମନୋବଳ ନେଇ ସେ ତାଙ୍କ ସନ୍ତରଣ ଯାତ୍ରା ଆଗକୁ ନେଲେ । ଓପନ ୱାଟର ସ୍ୱିମିଂ ଜାରି ରଖିବା ପରେ ବହୁ ସଫଳତା ତାଙ୍କ ହାତକୁ ଆସିଲା । ଏବେ ସୁଦ୍ଧା ସେ ବିଶ୍ୱର ସବୁଠୁ କନିଷ୍ଠ ଓ ମହିଳା ପ୍ରତିଯୋଗୀ ଭାବେ ଏସିଆ ମହାଦେଶର ପ୍ରଥମ ସନ୍ତରଣକାରୀ ହୋଇ ୪ଟି ମହାସାଗରରେ ସନ୍ତରଣ କରି ସାରିଛନ୍ତି ବୋଲି ଭକ୍ତି ଦାବି କରନ୍ତି ।
ଇଂଲିସ୍ ଚାନେଲ ଅତିକ୍ରମ
ତେବେ ଆଉ ଏକ ନିଆରା ରେକର୍ଡ ବି ଭକ୍ତିଙ୍କ ନାଁରେ ରହିଛି । ଝିଅ ଓ ମା ଯୋଡି ଭାବେ ଇଂଲିସ ଚାନେଲ ଅତିକ୍ରମ କରିଛନ୍ତି ସେ । ତେବେ ଏହା ପଛରେ ଥିବା କାହାଣୀ ବିଷୟରେ ସେ କୁହନ୍ତି, ମା ଓ ଝିଅ ଯୋଡି ହେବା ଆକସ୍ମିକ ଭାବେ ହୋଇଥିଲା । ଯୋଧପୁରରୁ ଆସିଥିବାଲ ଜଣେ ଝିଅ ସହ ମିଶି ସେ ଓ ତାଙ୍କ ମା ଇଲିଂସ ଚାନେଲ ପାର୍ ହୋଇଥିଲେ । ସେହିପରି ପୂର୍ବରୁ ମଧ୍ୟ ସେ ୧୬ ବର୍ଷ ବୟସ ହୋଇଥିବା ସମୟରେ ଏହାକୁ ଏକାକୀ ଅତିକ୍ରମ କରିଥିଲେ ।
ରାଷ୍ଟ୍ରପତିଙ୍କ ହାତରୁ ଆଡଭେଚଂର ଆୱାର୍ଡ
ସନ୍ତରଣରେ ସଫଳତା ପାଇଁ ଭକ୍ତି ୨୦୧୨ରେ ରାଷ୍ଟ୍ରପତିଙ୍କଠାରୁ ତେଞ୍ଜିଙ୍ଗ ନର୍ଗେ ନ୍ୟାସନାଲ ଆଡଭେଚଂର ଆୱାର୍ଡ ପାଇଥିଲେ । ତେବେ ପୁରସ୍କାର ପ୍ରଦାନ କାର୍ଯ୍ୟକ୍ରମ ବେଳର କଥା ମନେ ପକାଇ ସେ କୁହନ୍ତି, ପୁରସ୍କାର ପ୍ରଦାନ ସମାରୋହରେ ଯୁବରାଜ ସିଂହଙ୍କୁ ଅର୍ଜୁନ ପୁରସ୍କାର ମିଳିିଥିଲା । ମୋତେ ରାଷ୍ଟ୍ରପତି ଟ୍ରଫି ଦେବା ପୂର୍ବରୁ କଣ ପାଇଁ ମୋତେ ପୁରସ୍କାର ଦିଆଯାଉଛି ତାର ସୂଚନା(introduction) ପଢା ଗଲା । ମୁଁ ସନ୍ତରଣରେ ପାଇଥିବା କୃତିତ୍ୱ ଶୁଣି ଉପସ୍ଥିତ ସବୁ ଦର୍ଶକ ପ୍ରଂଶସାରେ ବାଃ..ବାଃ..କହୁଥିଲେ । ଏହା ମୋତେ ବହୁ ଖୁସି ଦେଇଥିଲା ।
ବରଫରେ ପହଁଁରା
ଏବେ ସେ ଆଣ୍ଟାର୍କଟୀକାରେ ସନ୍ତରଣ ପାଇଁ ପ୍ରସ୍ତୁତ ହେଉଛନ୍ତି । ଏଥିପାଇଁ ସେ ଅର୍ଥଯୋଗାଡରେ ଲାଗିଛନ୍ତି । ସନ୍ତରଣ ଦ୍ୱାରା ପିଲାଙ୍କ ପାଇଁ କାମ କରୁଥିବା ରାଜସ୍ଥାନର ଏକ ସ୍ୱେଚ୍ଛାସେବୀ ସଂଗଠନକୁ ମଧ୍ୟ ସେ ସହାୟତା ଦେଉଛନ୍ତି । ବିନା କୌଣସି ପ୍ରଫେସନାଲ ଟ୍ରେନର୍ ଓ ମ୍ୟାନେଜରଙ୍କ ବିନା ସେ ନିଜ ସ୍ୱପ୍ନକୁ ସତ କରିବାକୁ ପ୍ରୟାସ ଜାରି ରଖିଛନ୍ତି । କେବଳ ତାଙ୍କ ପରିବାର ଲୋକଙ୍କ ସହଯୋଗରେ ସେ ଆଗକୁ ମାଡି ଚାଲିଛନ୍ତି । ତାଙ୍କ ଦୈନିକ ରୁଟିନ୍ ବିଷୟରେ ସେ କୁହନ୍ତି, ସ୍ୱିମିଂ ପାଇଁ ଅତି କମ୍ ଦୁଇ ଘଣ୍ଟା ଅଭ୍ୟାସ କରେ । କାନ୍ଧ ଜଖମରୁ ମୁକ୍ତି ପାଇଁ ଫିଜିଓଥେରାପି କରେ । ବହୁତ କିଛି ପଢେ । ଆୟୋଜକ ଯୋଗାଡ କରିବାକୁ ବହୁ ଇ-ମେଲ୍ ପଠାଇବାକୁ ପଡେ । ସନ୍ଧ୍ୟାରେ ଜିମ୍ ଯାଏ । ଏବେ ମୁଁ ନିଜେ ଆଥଲେଟ୍, ମ୍ୟାନେଜର, ଲୋକସମ୍ପର୍କ ଅଧିକାରୀ ଓ ଆୟୋଜକ ଯୋଗାଡ ପାଇଁ ଚେଷ୍ଟା କରୁଥିବା ଏଜେଟଂ । ଏସବୁ କାମକୁ ମୁଁ ନିଜେ କରେ ।
ସେହିପରି ସନ୍ତରଣକୁ କ୍ୟାରିଅର କରିବା ବିଷୟରେ ତାଙ୍କ ମତ ହେଉଛି, ଅନ୍ୟ କ୍ରୀଡା ଠାରୁ ସନ୍ତରଣ ପୂରା ଭିନ୍ନ । ବିଶେଷ କରି ମହିଳାଙ୍କ ପାଇଁ ସନ୍ତରଣ କ୍ୟାରିଅର କରିବା ବହୁ ଚାଲେଞ୍ଜ । ସ୍ୱିମିଂକୁ ନେଇ ଭାରତରେ ଉତ୍ସାହ କମ୍ ଓ ସେଲିବ୍ରେସନ ହୁଏନି । ସେହିପରି ବହୁ ଝିଅ ପୋଷାକ ସମସ୍ୟା ପାଇଁ ଭଲ ପ୍ରଦର୍ଶନ ସତ୍ୱେ ସନ୍ତରଣ କରିବା ଛାଡି ଦିଅନ୍ତି । ସରକାରୀ ସ୍କୁଲରୁ ସନ୍ତରଣ ପାଇଁ ଆସୁଥିବା ଝିଅମାନେ ଉପଯୁକ୍ତ ପୋଷାକ ବିନା କେମିତି ଅସୁବିଧା ଭୋଗନ୍ତି ତା ମୁଁ ଦେଖିଛି ବୋଲି ଭକ୍ତି କୁହନ୍ତି ।