'ଲୋକାଲ ନହେଲେ ଗ୍ଲୋବାଲ ନୁହେଁ': ବଲିଉଡ ଆପଣେଇଲା ଏହି ମନ୍ତ୍ର, ଶାହରୁଖଙ୍କ ଫ୍ୟାନ ଥିମ ସଙ୍ଗୀତ ୬ଟି ଆଞ୍ଚଳିକ ଭାଷାରେ ହେଇଛି ରେକର୍ଡ

0

ଗତ ସେନ୍ସସ (୨୦୦୧) ତଥ୍ୟରୁ ଏକ ମଜାଦାର ତଥ୍ୟ ଜଣା ପଡିଥିଲା ଯେ ଆମ ଦେଶରେ ଥିବା ୧.୨ ଲକ୍ଷ କୋଟି ଜନତାଙ୍କ ମଧ୍ୟରୁ କେବଳ ୨୦୦ ନିୟୁତ ଦେଶବାସୀ ଇଂରାଜୀ କହିବା ସହ ଲେଖିପଢି ପାରନ୍ତି। ଅର୍ଦ୍ଧେକରୁ କମ ଜନତା  ହିନ୍ଦୀ ଭାଷାଭାଷୀ। ବାକି ଯେଉଁ ଦେଶବାସୀ ବଳିଗଲେ ସେମାନେ କେଉଁ ଭାଷାରେ କଥା ହେଉଛନ୍ତି ବା ଲେଖାପଢା କରୁଛନ୍ତି ତା' କିଏ ପଚାରେ, ନୁହେଁ କି?

ଏବେ ଚାଷୀ ଠାରୁ ଆରମ୍ଭ କରି ମନ୍ତ୍ରୀ ଯାଏଁ, ସମସ୍ତଙ୍କ ପକେଟରେ ଅଛି ସ୍ମାର୍ଟ ଫୋନ। ଘରେ ଘରେ କମ୍ପ୍ୟୁଟର, ଲାପଟପ, ଟାବଲେଟ ଓ ଇଣ୍ଟରନେଟ। କିନ୍ତୁ ସମସ୍ତ ଲୋକପ୍ରିୟ ଗଣମାଧ୍ୟମ ଓ ଡିଜିଟାଲ ମାଧ୍ୟମରେ ମୁଖ୍ୟତଃ ଇଂରାଜୀ ଭାଷା ବ୍ୟବହାର କରାଯାଏ। ଦେଶର ଅଧାରୁ ଅଧିକ ଜନତାକୁ ଯଦି ଆମେ ଡିଜିଟାଲ ମାଧ୍ୟମରେ ଯୋଡିବାକୁ ଚାହିଁବା ତାହେଲେ ସେ ପୁଣି ସମ୍ଭବ ହେବ କିପରି? ୪୩% ଗ୍ରାମୀଣ ଭାରତୀୟ କହନ୍ତି ସେମାନେ ଇଣ୍ଟରନେଟ ବା ଡିଜିଟାଲ ମାଧ୍ୟମ ସେତେବେଳେ ବ୍ୟବହାର କରିବେ, ଯେତେବେଳେ ତାଙ୍କ ନିଜ ଭାଷାରେ ବିଷୟ ଉପଲବ୍ଧ ହେବ। ଗୁଗଲର ଅନୁସନ୍ଧାନ ଅନୁସାରେ ଆଞ୍ଚଳିକ ଭାଷାର ଉପଯୋଗ ଇଂରାଜୀ ଠାରୁ ଚାରିଗୁଣା ଅଧିକ ରହିବ। 

କାମଟି ପର୍ବତପ୍ରମାଣ ଲାଗୁଥାଇପାରେ କିନ୍ତୁ ଅସମ୍ଭବ ନୁହେଁ। ଟ୍ରେଣ୍ଡ ବଦଳୁଛି। ଆଞ୍ଚଳିକ ଭାଷା ଗୁଡିକରେ ଏବେ ଅନେକ ୱେବସାଇଟ ଉପଲବ୍ଧ। ସ୍ମାର୍ଟ ଫୋନରେ ଆପ୍ପ ବି ମିଳୁଛି। ସୋସିଆଲ ମିଡିଆରେ ନିଜ ନିଜ ମାତୃଭାଷାରେ ଲେଖିବାକୁ ଲୋକେ ପସନ୍ଦ କଲେଣି। ଗପ, କବିତା ସହ ଢଗଢମାଳି ବି ପଢିବାକୁ ମିଳୁଛି। 

ଏହି ଟ୍ରେଣ୍ଡରୁ ବଲିଉଡ ବା ବାଦ ପଡନ୍ତା କେମିତି। ଆଗକୁ ଆସୁଥିବା ସୁପରଷ୍ଟାର ଶାହରୁଖ ଖାନଙ୍କ ଫିଲ୍ମ “ଫ୍ୟାନ”ଏହାର ଜଳନ୍ତା ଉଦାହରଣ। ଚର୍ଚ୍ଚାରେ ଫିଲ୍ମର ଥିମ ସଙ୍ଗ “ଜବରା ଫ୍ୟାନ”। କାହିଁକି?? ପ୍ରଥମ ଥର ପାଇଁ ବଲିଉଡର କୌଣସି ଫିଲ୍ମର ଗୀତ ୬ଟି ଆଞ୍ଚଳିକ ଭାଷାରେ ରେକର୍ଡ କରାଯାଇଛି। ଏହା ଏକ ରେକର୍ଡ।

ଅପ୍ରେଲ ୧୫ ତାରିଖରେ ରିଲିଜ ହେବାକୁ ଯାଉଛି ଆଦିତ୍ୟ ଚୋପ୍ରା ନିର୍ଦ୍ଦେଶିତ ଓ ଶାହାରୁଖ ଖାନ ଅଭିନୀତ ଚଳଚିତ୍ର “ଫ୍ୟାନ”। ତା ପୂର୍ବରୁ ଏବେ ଚର୍ଚ୍ଚାରେ ଫିଲ୍ମର ଥିମ ସଙ୍ଗ “ଜବରା ଫ୍ୟାନ”। ଓଡିଆରେ କହିଲେ ଜବରା ଫ୍ୟାନର ମାନେ ହେବ ଜବରଦସ୍ତ ଫ୍ୟାନ ବା ବଡ ପ୍ରଶଂସକ। ସୋସିଆଲ ମେଡିଆରେ ଏବେ ଗୀତ ଟି ଭାଇରାଲ। ମାତ୍ର ଅଳ୍ପ କିଛି ଦିନ ଭିତରେ ଲକ୍ଷ ଲକ୍ଷ ଦର୍ଶକ ଦେଖିଛନ୍ତି ଏହି ଗୀତଟିକୁ ଆଉ ପ୍ରଶଂସା ବି କରିଛନ୍ତି। ଏଠାରେ ସବୁଠାରୁ ଉଲ୍ଲେଖନୀୟ କଥାଟି ହେଲା ଏହି ଗୀତଟି କେବଳ ହିନ୍ଦୀ ନୁହେଁ ଭୋଜପୁରୀ, ତାମିଲ, ପଞ୍ଜାବୀ, ବଙ୍ଗଳା ଓ ମରାଠୀ ଭଳି ଆଞ୍ଚଳିକ ଭାଷାରେ ମଧ୍ୟ ରେକର୍ଡ କରାଯାଇଛି ଓ ଏହି ଆଞ୍ଚଳିକ ସଂସ୍କରଣ ଗୁଡିକ ମଧ୍ୟ ମୂଳ ହିନ୍ଦୀ ଗୀତ ଭଳି ସମ ପରିମାଣରେ ଲୋକପ୍ରିୟ ହୋଇ ପାରିଛନ୍ତି।

ଉଭୟ ଆଦିତ୍ୟ ଓ ଶାହାରୁଖ ନିଜର ପରୀକ୍ଷା ନିରୀକ୍ଷା ଅଭ୍ୟାସ ପାଇଁ ଜଣାଶୁଣା। ଫିଲ୍ମ ଜଗତରେ ସବୁ ବେଳେ ସେମାନେ କିଛି ନୂଆ କରିବାକୁ ଚେଷ୍ଟା କରିଥାନ୍ତି। ବର୍ତ୍ତମାନ ଆଞ୍ଚଳିକ ଭାଷାରେ ଫିଲ୍ମକୁ ଡବ କରି ବିତରଣ କରିବାର ପରମ୍ପରା ବଲିଉଡରେ ଆରମ୍ଭ ହୋଇଛି। ଚଳଚିତ୍ରର ବ୍ୟବସାୟ ବୃଦ୍ଧି ପାଇଁ ଏପରି ପରୀକ୍ଷା ନିରୀକ୍ଷା କରାଯାଉଛି। ଏ କ୍ଷେତ୍ରରେ ଆଉ ପାଦେ ଆଗେଇ ଯାଇଛନ୍ତି ଆଦିତ୍ୟ ଓ ଶାହାରୁଖ ଏବଂ ନିଜ ଚଳଚିତ୍ରର ଥିମ ସଙ୍ଗକୁ ରିଲିଜ କରିଛନ୍ତି ୬ ଟି ଆଞ୍ଚଳିକ ଭାଷାରେ। ଆଉ ପ୍ରତିଟି ଆଞ୍ଚଳିକ ସଂସ୍କରଣକୁ ଗାଇଛନ୍ତି ସେହି ଭାଷାର ଜଣେ ଲୋକପ୍ରିୟ ଗାୟକ। ଭୋଜପୁରୀ ସଂସ୍କରଣକୁ ମନୋଜ ତିଵାରୀ ଗାଇଥିଲା ବେଳେ ହରଭଜନ ମାନ ପଞ୍ଜାବୀରେ, ଅରବିନ୍ଦ ବେଗଡା ଗୁଜୁରାଟୀରେ, ନକାଶ ଅଜିଜ ତାମିଲରେ ଓ ଅନୁପମ ରୟ ବଙ୍ଗାଳୀ ସଂସ୍କରଣଟିରେ କଣ୍ଠଦାନ କରିଛନ୍ତି।

ଅଳ୍ପ କିଛି ଦିନ ଭିତରେ “ଜବରା ଫ୍ୟାନ” କିପରି ଏଭଳି ସଫଳତା ପାଇଲା, ତାର କାରଣ ଖୋଜିଲେ ମୁଖ୍ୟତଃ ତିନୋଟି କଥା ମନକୁ ଆସିଥାଏ। ପ୍ରଥମ ଟି ହେଲା, ଏହି ଗୀତ ସହ କନେକ୍ଟ କରିବାକୁ ହେଲେ ଆପଣଙ୍କୁ ଶାହରୁଖଙ୍କ ପ୍ରଶଂସକ ହେବା ଦରକାର ନାହିଁ। ଯିଏ ବି ଆପଣଙ୍କ ପ୍ରିୟ ବ୍ୟକ୍ତିତ୍ଵ ହେଉ ଆପଣ ତାଙ୍କ ପାଇଁ ଏହି ଗୀତଟି ଗୁଣଗୁଣେଇ ପାରିବେ। ଦ୍ଵିତୀୟଟି ହେଲା, ଏହି ଗୀତର ସରଳ ଲିରିକ୍ସ ଓ ସରଳ ଗାୟନ ଶୈଳୀ। ଏହା ଗୀତଟିକୁ ପ୍ରଶଂସକ ମାନଙ୍କର ନିକଟତର କରିପାରିଛି। ତୃତୀୟଟି ହେଲା, ହୁଏତ ଅନେକ ଦିନ ପରେ ପ୍ରଥମ ଥର ପାଇଁ କୌଣସି ଗୀତ ଫ୍ୟାନମାନଙ୍କ ବିଶେଷତ୍ଵ ଉପରେ ତିଆରି ହେଇଛି। ଫ୍ୟାନମାନେ ହିଁ ତାରକା ମାନଙ୍କୁ ତିଆରି କରନ୍ତି।

ଆଞ୍ଚଳିକ ସଂସ୍କରଣ ଗୁଡିକ ସଫଳ ହେବା ପଛରେ ପ୍ରମୁଖ କାରଣ ଗୁଡିକ ହେଲା ଗୀତଟିର ଭାଷପୋଯୋଗୀ ଅନୁବାଦ ଓ ସେହି ଭାଷାର ଲୋକପ୍ରିୟ ଗାୟକ ମାନଙ୍କ କଣ୍ଠର ଯାଦୁ। ଆଞ୍ଚଳିକ ସଂସ୍କରଣ ଗୁଡିକରେ ହିନ୍ଦୀ ଗୀତଟି ଆକ୍ଷରିକ ଅନୁବାଦ କରା ନଯାଇ ଭାବର ଅନୁବାଦ ଉପରେ ଗୁରୁତ୍ଵ ଦିଆଯାଇଛି। ଉଦାହରଣ ସ୍ୱରୂପ ବେଙ୍ଗଲୀ ସଂସ୍କରଣରେ “ଜବରା ଫ୍ୟାନ” ପାଇଁ “ବ୍ୟାପୋକ ଫ୍ୟାନ” ବ୍ୟବହାର କରଯାଇଥିଲା ବେଳେ ଗୁଜୁରାଟୀରେ “ଜବରୁ ଫ୍ୟାନ”, ତାମିଲରେ “ଟକ୍କରା ଫ୍ୟାନ”, ଭୋଜପୁରୀ ସଂସ୍କରଣରେ “ଜବରଦସ୍ତ ଫ୍ୟାନ” ଶବ୍ଦ ବ୍ୟବହାର କରାଯାଇଛି। ଗୀତର ସଠିକ ଲୋକଲାଇଜେସନ ବା ଆଞ୍ଚଳୀକରଣ ସହ ଗାୟକଙ୍କ କଣ୍ଠର ଯାଦୁ ଶ୍ରୋତାଙ୍କୁ ଅଭିଭୂତ କରୁଛି।

ଇଣ୍ଟରନେଟର ବ୍ୟାପକ ପ୍ରସାର ପରେ ଭାରତରେ ଯୋଗାଯୋଗ, ମନୋରଞ୍ଜନ ଓ ଗଣମାଧ୍ୟମ କ୍ଷେତ୍ରରେ ବ୍ୟାପକ ପରିବର୍ତ୍ତନ ଆସିଛି। ଉପଲବ୍ଧ ବିକଳ୍ପମାନଙ୍କ ବହୁଳତା ଏବେ ଉପଭୋକ୍ତାକୁ ଏହି କ୍ଷେତ୍ରର ରାଜା କରିପାରିଛି। ଶ୍ରୋତାର ପସନ୍ଦ, ଆବଶ୍ୟକତା ଓ ରୁଚି କୁ ପ୍ରଥମିକତା ଦିଆ ନ ଗଲେ ଆଖିଦୃଶିଆ ସଫଳତା ମିଳିବା ସମ୍ଭବ ନୁହେଁ। ଗତ ଶତାବ୍ଦୀ ଭଳି ଯୋଗାଯୋଗ, ମନୋରଞ୍ଜନ ଓ ଗଣମାଧ୍ୟମ ଏବେ ଆଉ ଏକ ମୁହଁ। ରାସ୍ତା ହୋଇ ରହି ନାହିଁ। ଏପରି କ୍ଷେତ୍ରରେ କଣ୍ଟେଣ୍ଟର ଆଞ୍ଚଳୀକରଣ ଓ ଅନଲାଇନ ମାଧ୍ୟମରେ ବହୁଳ ପ୍ରସାରଣ ହିଁ ବ୍ୟବସାୟର ନୂତନ ଦିଗନ୍ତ ସୃଷ୍ଟି କରିପାରିବ, ତାହା “ଜବରା ଫ୍ୟାନ” ପ୍ରମାଣିତ କରିପାରିଛି।  

ବଲିଉଡ ବି ଏବେ ବୁଝିଛି ଯେ ଗ୍ଲୋବାଲ ହେବା ପାଇଁ ପ୍ରଥମେ ଲୋକାଲ ହେବାକୁ ପଡିବ!


ଏହି ଗୀତର ସମସ୍ତ ସଂସ୍କରଣ ଦେଖନ୍ତୁ ଏଠାରେ :

ଓଡିଆ : ଗାୟକ - ବିଭୁକିଶୋର


ଭୋଜପୁରୀ ସଂସ୍କରଣ : ଗାୟକ - ମନୋଜ ତିଵାରୀ

ପଞ୍ଜାବୀ : ଗାୟକ - ହରଭଜନ ମାନ

ତାମିଲ : ଗାୟକ - ନକାଶ ଅଜିଜ

ବଙ୍ଗଳା : ଗାୟକ - ଅନୁପମ ରାୟ

ଗୁଜୁରାତି : ଗାୟକ - ଅରବିନ୍ଦ ବେଗଡା

ମରାଠୀ : ଗାୟକ - ଅବଧୂତ ଗୁପ୍ତେ