ଦୀପକ ରବିନ୍ଦ୍ରନ: ଅଧାରୁ ପାଠ ଛାଡ଼ିଥିଲେ, ଏବେ ଦେଉଛନ୍ତି ଚାକିରି

ହାଇପର୍ ଲୋକାଲ୍ ମେସେଜିଂ ଆପ୍ସ “ଲୁକ୍ ଅପ୍’କୁ ବିକଶିତ କରିଛନ୍ତି ବେଙ୍ଗାଲୁରୁର ଯୁବକ ଦୀପକ ରବିନ୍ଦ୍ରନ । ରବିନ୍ଦ୍ରନଙ୍କ ଉଦ୍ୟୋଗୀ ହେବା କାହାଣୀ ବେଶ ପ୍ରେରଣାଦାୟକ । ଏକଦା କଲେଜରେ ପାଠ ପଢ଼ୁଥିବା ବେଳେ ନିଜ ସ୍ୱପ୍ନକୁ ପୂରଣ କରିବା ପାଇଁ ସେ ଅଧାରୁ ପାଠ ଛାଡ଼ି ଦେଇଥିଲେ । ଏବେ ନିଜ କଲେଜର ଅଧିକାଂଶ ବିର୍ଦ୍ୟାଥୀଙ୍କୁ ଚାକିରି ଦେଉଛନ୍ତି ଏହି ଯୁବକ । ସେ ବିକଶିତ କରିଥିବା ମେସେଜିଙ୍ଗ ଆପ୍ସ ଜରିଆରେ ବ୍ୟବସାୟ ସଂସ୍ଥାଗୁଡ଼ିକ ଗ୍ରାହକଙ୍କ ସହ ସଂପର୍କ ସ୍ଥାପନ କରିପାରୁଛନ୍ତି । ଏହି ଷ୍ଟାର୍ଟଅପ୍ ସଂସ୍ଥାରେ Twitterର ସହ ପ୍ରତିଷ୍ଠାତା ବିଜ୍ ଷ୍ଟୋନ୍ ଓ Infosysର ପୂର୍ବତନ ସିଇଓ କ୍ରିସ୍ ଗୋପାଳକୃଷ୍ଣନ ପୁଞ୍ଜିନିବେଶ କରିଛନ୍ତି । ନିକଟରେ ଲୁକ୍ ଅପ୍ ଏହାର ଚୂଡ଼ାନ୍ତ ପର୍ଯ୍ୟାୟ ପାଣ୍ଠି ହାସଲ କରିଛି ।

---

ମା’ଙ୍କ କଥାରୁ ବାହାରିଥିଲା ନୂଆ ପରିକଳ୍ପନା

କେରଳର କାସରଗଡ଼ରେ ହେଉଛି ରବିନ୍ଦ୍ରନଙ୍କ ଘର । ନିଜ ଘରେ ଥିବା ବେଳେ ସେ ଦିନେ ଦେଖିଲେ ତାଙ୍କ ମା’ ହ୍ୱାଟସ୍ଆପ୍ ଜରିଆରେ ଗ୍ରୋସରି ଦୋକାନରୁ ସାମଗ୍ରୀ ଆଣିବାକୁ ବରାଦ ଦେଉଛନ୍ତି । ବାସ୍, ଲୁକ୍ ଅପକୁ ଆରମ୍ଭ କରିବାକୁ ସେହିଦିନ ରବିନ୍ଦ୍ରକୁ ମିଳିଗଲା ପ୍ରେରଣା । ଲୋକମାନେ ଯେଉଁ ଭଳି ଭାବେ ଚାଟିଙ୍ଗକୁ ଜୀବନର ଏକ ଅଙ୍ଗ ଭାବେ ପରିଣତ କରିଛନ୍ତି ତାହାକୁ ନେଇ ଏକ ବ୍ୟବସାୟିକ ସଂସ୍ଥା ଗଠନ କରିବାରେ ଲାଗିପଡ଼ିଲେ ରବିନ୍ଦ୍ରନ।

---

ହ୍ୱାଟସ୍ଆପରେ କଣ ହୁଏ ନା କୌଣସି ବ୍ୟକ୍ତିଙ୍କ ସହ ଚାଟିଂ କରିବାକୁ ହେଲେ ତାଙ୍କ ଫୋନ୍ ନମ୍ବରକୁ ନିଜ ଫୋନରେ ସେଭ୍ କରିବାକୁ ପଡୁଛି । ଯଦି ନିଜର ପ୍ରୋଫାଇଲ୍ ଫୋଟୋ ପରିବର୍ତ୍ତନ ହେଲା ତାହା ସମସ୍ତେ ଜାଣିପାରୁଛନ୍ତି । ଏହା ଗୋପୀନିୟତାର ଉଲ୍ଲଘଂନ ହେଉଛି ବୋଲି ଧରାଯାଇପାରିବ । ଲୁକ୍ ଅପ୍ ଜରିଆରେ ରବିନ୍ଦ୍ରନ ସେହି ସମସ୍ୟାଗୁଡ଼ିକୁ ସମାଧାନ କରିବାକୁ ପ୍ରୟାସ କରିଛନ୍ତି ।

୩୦ ବର୍ଷୀୟ ରବିନ୍ଦ୍ରନଙ୍କ ଏହା ହେଉଛି ତୃତୀୟ ଷ୍ଟାର୍ଟଅପ୍ । ଏହା ପୂର୍ବରୁ ସେ ଏସ୍ଏମ୍ଏସ୍ ଭିତ୍ତିକ ସର୍ଚ ଇଞ୍ଜିନ ଆଇନଜ୍ ବିକଶିତ କରିଥିଲେ । ୨୦୦୭ରେ ଆଇନଜକୁ ବିକଶିତ କରିଥିଲେ । ସେହି ସମୟରେ ମୋବାଇଲ୍ ଫୋନରେ ମେସେଜ୍ ପଠାଇବାର କ୍ରେଜ୍ ବହୁତ ବଢ଼ିଯାଇଥିଲା । କିନ୍ତୁ ଇଂଟରନେଟ୍ ଏତେ ବ୍ୟାପକ ଭାବେ ଲୋକମାନଙ୍କ ପାଖରେ ପହଚିଂ ପାରି ନ ଥିଲା । ସେଥିପାଇଁ ସେ ଆଇନଜ୍ ନାମକ ଏସଏମ୍ଏସ ଭିତ୍ତିକ ଅଫଲାଇନ୍ ସର୍ଚ ଇଞ୍ଜିନ ଆରମ୍ଭ କରିଥିଲେ । ତାଙ୍କର ସବୁଠୁ ବଡ଼ ଶକ୍ତି ହେଉଛି ସେ ମେସେଜିଂ ଶିଳ୍ପକୁ ବହୁତ ଭଲ ଭାବେ ବୁଝିପାରିଛନ୍ତି । ତାହା ହିଁ ତାଙ୍କୁ ପରିବର୍ତ୍ତୀତ ସମୟରେ ନୂତନ ଷ୍ଟାର୍ଟଅପ୍ ସଂସ୍ଥା ସୃଷ୍ଟି କରିବାକୁ ପ୍ରେରଣା ଯୋଗାଉଛି ।

୨୦୧୪ ବେଳକୁ ସେ ପୁଣି ବୁଝିପାରିଲେ ଯେ ଡାଟା ସହିତ ଭଏସ୍ କଲର ଗୁରୁତ୍ୱ ମଧ୍ୟ ସମ ପରିମାଣରେ ବୃଦ୍ଧି ପାଇଲାଣି । ସେ ଚାଟିଂଙ୍ଗ ଓ ମୋବାଇଲ୍ ଆପ୍ସକୁ କିଭଳି ଏକତ୍ରିତ କରାଯାଇପାରିବ ସେ ବିଷୟରେ ଭାବିବାକୁ ଲାଗିଲେ । ସେହି ଭାବନାରୁ ହିଁ ଲୁକ୍ ଅପର ମୁଳଦୁଆ ପଡ଼ିଥିଲା ।

ଷ୍ଟିଭ୍ ଜବ୍ସ ଥିଲେ ପ୍ରେରଣା ଉତ୍ସ

ଋବିନ୍ଦ୍ରନଙ୍କୁ ୧୮ ବର୍ଷ ହୋଇଥିବା ବେଳେ ସେ ଥିଲେ ଜଣେ ସାଧାରଣ ଭାରତୀୟ ବିଜ୍ଞାନ ଛାତ୍ର । ଉଭୟ ଇଞ୍ଜିନିୟରିଂ ଓ ମେଡିକାଲ୍ ପ୍ରବେଶିକା ପରୀକ୍ଷା ଦେଇ ଭଲ ରାଙ୍କ ରଖିଥିଲେ । ମାତ୍ର କମ୍ପ୍ୟୁଟର ପ୍ରତି ରହିଥିବା ଦୁର୍ବଳତା ଯୋଗୁଁ ସେ କମ୍ପ୍ୟୁଟର ସାଇନ୍ସରେ ଇଞ୍ଜିନିୟରିଂ ପଢ଼ିବାକୁ ଆଗ୍ରହ ଦେଖାଇଥିଲେ । ରବିନ୍ଦ୍ରନ ଜାଣିବାକୁ ପାଇଲେ ଯେ ଇଟଂରନେଟର ଇତିହାସ ବେଶି ପୁରୁଣା ନୁହେଁ । ସେ ଯେତେବେଳେ ଡାଏଲ ଅପରେ ଇଟଂରନେଟ୍ ସଂଯୋଗ କରି ବିଭିନ୍ନ ବିଷୟ ପଢ଼ିବାକୁ ଲାଗିଲେ ତାହା ତାଙ୍କ ମନକୁ ଆନ୍ଦୋଳିତ କରିଦେଇଥିଲା । ଇଟଂରନେଟର ଶକ୍ତିରେ ବିମୋହିତ ହୋଇ ସେ ବିଭିନ୍ନ ପ୍ରଯୁକ୍ତି ବାଦଶାହଙ୍କ ପ୍ରେରଣାଦାୟୀ କାହାଣୀଗୁଡ଼ିକୁ ପଢ଼ିବାକୁ ଲାଗିଲେ । ସେ ଆପଲର ପ୍ରତିଷ୍ଠାତା ଷ୍ଟିଭ୍ ଜବ୍ସଙ୍କ କାହାଣୀ ପଢ଼ିଲେ । କମ ବୟସରେ କିଭଳି ସେମାନେ ବ୍ୟବସାୟ ଆରମ୍ଭ କରିଥିଲେ ତାହା ଜାଣିବାକୁ ପାଇଥିଲେ ।

---

୨୦୦୭ରେ ଅଧାରୁ ଇଞ୍ଜିନିୟରିଂ ଛାଡ଼ିଦେଲେ

୨୦୦୫ରେ ସେ କାସରଗଡ଼ରେ ଥିବା ଲାଲ ବାହାଦୂର ଶାସ୍ତ୍ରୀ ଇଞ୍ଜିନିୟରିଂ କଲେଜରେ ପ୍ରବେଶ କରିଥିଲେ । ୨୦୦୭ରେ ତିନି ଜଣ ସହପାଠୀ ମିଶି ଏକ ପ୍ରକଳ୍ପ ବିକଶିତ କରିଥିଲେ ଯାହା ଆଇଆଇଏମ୍-ଅହମ୍ମଦାବାଦର ଦୃଷ୍ଟି ଆକର୍ଷଣ କରିଥିଲା । ସେହି ପରିକଳ୍ପନାକୁ ରୂପ ଦେବା ପାଇଁ ୩-୫ ଲକ୍ଷ ଟଙ୍କାର ପାଣ୍ଠି ପ୍ରଦାନ କରାଯିବ ବୋଲି ଆଇଆଇଏମ୍-ଏ ଆସେଲେଟରଙ୍କ ପକ୍ଷରୁ ପ୍ରତିଶ୍ରୁତି ଦିଆଗଲା । ଏବେ ରବିନ୍ଦ୍ରନଙ୍କ ପାଖରେ ଦୁଇଟି ବିକଳ୍ପ ଥିଲା । ଗୋଟିଏ ହେଉଛି ନିଜ ସ୍ୱପ୍ନକୁ ଭୁଲି ଯିବେ ଆଉ ପାଠପଢ଼ାରେ ମନୋନିବେଶ କରିବେ । ଦ୍ୱିତୀୟଟି ଥିଲା ପାଠ ଅଧାରୁ ଛାଡ଼ି ଦେଇ ସ୍ୱପ୍ନକୁ ଅନୁସରଣ କରିବେ । ଦ୍ୱିତୀୟ ବିକଳ୍ପଟିକୁ ସେ ଚୟନ କଲେ । ଆଶ୍ଚର୍ଯ୍ୟର ବିଷୟ ହେଉଛି ତିନି ସହପାଠୀ ଅଧାରୁ ପାଠ ଛାଡ଼ିଦେଲେ ବୋଲି ତାଙ୍କ ଘର ଲୋକ ଜାଣିପାରି ନ ଥିଲେ । ଘର ଲୋକ ଭାବୁଥିଲେ ଯେ ଆଇଆଇଏମରେ ଏମବିଏ ପଢ଼ିବାକୁ ସେମାନେ ଯାଇଛନ୍ତି । କଲେଜ ଛାଡ଼ିବା ବେଳକୁ ରବିନ୍ଦ୍ରନଙ୍କ ବହୁତ ଡ଼ର ଥିଲା । ଯିଦ ଉଦ୍ୟୋଗଟି କାମ ନ ଦେବ ତେବେ ତାଙ୍କୁ ଭଲ ଚାକିରି ଖଣ୍ଡିଏ ଆଉ ମିଳିବ ନାହିଁ । କିନ୍ତୁ ସେଭଳି ଦିନ ଆସି ନ ଥିଲା । ଯେଉଁ ଚାକିରି ହରାଇବାକୁ ରବିନ୍ଦ୍ରନ ଡରୁଥିଲେ ଏବେ ସେ ନିଜ କଲେଜର ୧୦୦ ଛାତ୍ରଛାତ୍ରୀଙ୍କୁ ଆଇନଜ୍ ଓ ଲୁକ୍ ଅପରେ ଚାକିରି ଦେଇଛନ୍ତି ।

ପ୍ରତିଯୋଗୀରୁ ସହଯୋଗୀ

୨୦୧୩ରେ ଏଭଳି ଏକ ସମୟ ଥିଲା ଯେତେବେଳେ ରବିନ୍ଦ୍ରନଙ୍କ ଆଇନଜ୍ କଂପାନିର ପ୍ରତିଯୋଗୀ ଥିଲା Twitter। ପରବର୍ତ୍ତୀ ସମୟରେ କିନ୍ତୁ Twitterର ସହ ପ୍ରତିଷ୍ଠାତା ବିଜ୍ ଷ୍ଟୋନ୍ ରବିନ୍ଦ୍ରନଙ୍କ ସହଯୋଗୀ ହୋଇଯାଇଥିଲେ । ସେ ଲୁକ୍ ଅପରେ ପୁଞ୍ଜିନିବେଶ କରିଥିଲେ । Infosysର କ୍ରିସ୍ ଗୋପାଳକୃଷ୍ଣନ ମଧ୍ୟ ଲୁକ୍ ଅପରେ ଥିବା ଦମକୁ ପରଖିପାରି ସେଥିରେ ପୁଞ୍ଜିନିବେଶ କରିଛନ୍ତି ।

Check the App here.