ପୈତୃକ ଘର ବିକି କୋଟିଏ ଟଙ୍କାରେ ପ୍ରତିଷ୍ଠା କଲେ ହସ୍ପିଟାଲ୍, ଦୋକାନ କରି ନିଜ ଗୁଜରାଣ ମେଣ୍ଟାଉଛନ୍ତି ହନୁମାନ ସହାୟ

0

ସମୟ, ସମାଜ ଓ ଇତିହାସ ସେମାନଙ୍କୁ ମନେରଖେ ନାହିଁ, ଯେଉଁମାନଙ୍କର ଦେଶପ୍ରତି କୌଣସି ଅବଦାନ ନଥାଏ| ଇତିହାସ ସେମାନଙ୍କୁ ମନେ ପକାଏ ଯେଉଁମାନଙ୍କ ପାଖରେ ସବୁକିଛି ଥାଏ, ତଥାପି ସେମାନେ ନିଜର ସର୍ବସ୍ୱ ଦେଶ ପାଇଁ ତ୍ୟାଗ କରିଦିଅନ୍ତି | ସେମାନଙ୍କର ନିଜ ଚିନ୍ତା ନଥାଏ | ଅନ୍ୟ ମୁହଁରେ ଖୁସୀ ଦେଖିବା ହିଁ ସେମାନଙ୍କର ଏକମାତ୍ର ଲକ୍ଷ୍ୟ ଥାଏ | ଏମିତି ଜଣେ ବ୍ୟକ୍ତି ହେଲେ ହନୁମାନ ସହାୟ | ଜୟପୁର ଠାରୁ ପ୍ରାୟ ୭୦ କିଲୋମିଟର ଦୂର ଶାହପୁର ଅଂଚଳର ଲୁହାକନା ଗାଁର ଜଣେ ସାଧାରଣ ଦେକାନୀ ସେ | କିନ୍ତୁ ସେ ଯେଉଁ କାମ କରିଛନ୍ତି, ତାହା ଅସାଧାରଣ | ପୂର୍ବରୁ ବିହାର ରାଜଧାନୀ ପାଟଣାରେ ତାଙ୍କର ଦୋକାନ ଥିଲା | ପାଂଚ ବର୍ଷ ପୂର୍ବେ ନିଜର ରୋଗାକ୍ରାନ୍ତ ବାପାଙ୍କୁ ଦେଖିବା ପାଇଁ ସେ ଗାଁକୁ ଆସିଥିଲେ | ଗାଁରେ ସେ ଦେଖିଥିଲେ ଜଣେ ମହିଳା ପ୍ରସବ ପୀଡାରେ ଛଟପଟ ହେଉଛନ୍ତି | କିନ୍ତୁ ପାଖରେ ଡାକ୍ତରଖାନା ନଥାଏ | ସେ ଏହି ମହିଳାଙ୍କୁ ବହୁ ଦୂରରେ ଥିବା ହସ୍ପିଟାଲକୁ ନେଇଥିଲେ | ବାଟଯାକ ସେ ଛଟପଟ ହେଉଥିଲେ | ସେତିକିବେଳେ ତାଙ୍କ ବାପା କହିଥିଲେ ଗାଁରେ ଏକ ହସ୍ପିଟାଲ୍ ଥିଲେ ଭଲ ହୋଇଥାନ୍ତା | ସେହିଦିନ ହନୁମାନ ସହାୟ ମନରେ ସ୍ଥିର କରିଥିଲେ ଗାଁରେ ମାତାପିତାଙ୍କ ନାଁରେ ଏକ ହସ୍ପିଟାଲ ପ୍ରତିଷ୍ଠା କରିବାକୁ | ତାହା ପୁଣି ଘରୋଇ ନୁହେଁ, ସରକାରୀ ଡାକ୍ତରଖାନା | ଯେଉଁଠାରେ ମାଗଣାରେ ଚିକିତ୍ସା ହୋଇପାରିବ | ୟୋରଷ୍ଟୋରୀକୁ ସେ କହନ୍ତି,

ମୋର ପୈତୃକ ଘର ଥିଲା | ଜୟପୁରରେ ଗୋଟିଏ ଦୋକାନ ମଧ୍ୟ ଥିଲା | ଯାହାକୁ ମୁଁ ବିକି ଦେଇଥିଲି | ଜମି କିଣି ଗାଁରେ ହସ୍ପିଟାଲ୍ ପ୍ରତିଷ୍ଠା କରିଛି | ଏଥିପାଇଁ ଜୟପୁରରେ ବିଭିନ୍ନ ଲୋକଙ୍କ ପାଖକୁ ଯିବାକୁ ପଡିଛି | ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହେଲଟଙ୍କୁ ଜନତା ଦରବାରରେ ସାକ୍ଷାତ କରି ହସ୍ପିଟାଲରେ ଡାକ୍ତର ଯୋଗାଇ ଦେବା ଲାଗି ଅନୁରୋଧ କରିଛି | ତାଙ୍କ କହିବା ପରେ ସ୍ୱାସ୍ଥ୍ୟ ବିଭାଗ ମଧ୍ୟ ସହଯୋଗ କରିଛି |

ଏହା ଥିଲା ବହୁତ ଭଲ କାମ | କିନ୍ତୁ ଏଥିପାଇଁ ଅର୍ଥ ଯୋଗାଡ କରିବା ସହଜ ନଥିଲା | ସହାୟ କାହା ପାଖରେ ହାତ ପତାଇନଥିଲେ | ତାଙ୍କ ଗାଁ ପାଖରେ ଦିଲ୍ଲୀ-ଜୟପୁର ରାଜପଥ ପାଖରେ ଥିବା ପୈତୃକ ଘରକୁ ସେ ବିକିବା ଲାଗି ନିଷ୍ପତି ନେଲେ | ଏହାକୁ ବିକି ସେ ପାଇଲେ ୭୦ ଲକ୍ଷ ଟଙ୍କା | ଆଉ ୩୦ ଲକ୍ଷ ଟଙ୍କା ମିଶାଇ ଏକ କୋଟି ଟଙ୍କାରେ ସେ ହସ୍ପିଟାଲ ପ୍ରତିଷ୍ଠା କଲେ | ଏହି ହସ୍ପିଟାଲରେ ୨୭ ଟି ବଡ ହଲ୍ ରହିଛି | ଡାକ୍ତର ଓ ନର୍ସିଂ ଷ୍ଟାଫ୍ ରହିବା ପାଇଁ ବାସଗୃହ ନିର୍ମିତ କରାଯାଇଛି | ଏତେ ବଡ ହସ୍ପିଟାଲ ପ୍ରତିଷ୍ଠା ହେବା ପରେ ଡାକ୍ତର ବ୍ୟବସ୍ଥା କରିବା ସହାୟଙ୍କ ପାଖରେ ସମ୍ଭବ ହୋଇନାହିଁ | କିନ୍ତୁ ତାଙ୍କର ପରିଶ୍ରମ ଓ ନିସ୍ୱାର୍ଥ ସେବାକୁ ଦେଖି ଗ୍ରାମବାସୀ ତାଙ୍କ ସହ ସାମିଲ ହୋଇଛନ୍ତି | ଡାକ୍ତର ବ୍ୟବସ୍ଥା କରିବାକୁ ଗାଁ ଲୋକ ସରକାରଙ୍କ ଉପରେ ଚାପ ପକାଇଲେ | ଛଅ ମାସ ହେଲାଣି ବିଭିନ୍ନ ସମୟରେ ସେ ସ୍ୱାସ୍ଥ୍ୟ ବିଭାଗ ଅଧିକାରୀଙ୍କୁ ଭେଟି ଏ ଦିଗରେ କାମ ଚଳାଇଛନ୍ତି | ଖୁବଶୀଘ୍ର ଏଠାରେ ଡାକ୍ତର ନିଯୁକ୍ତି ହେବେ ଓ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ଏହାକୁ ଉଦଘାଟଣ କରିବାକୁ ଯାଉଛନ୍ତି | ସହାୟଙ୍କ ଏହି କାମରେ ଗ୍ରାମବାସୀ ବେଶ୍ ଖୁସୀ ଅଛନ୍ତି | ସେଠାକାର ସରପଞ୍ଚ ଦରିୟାବଦ ସିଂହ କହନ୍ତି,

“ହନୁମାନ ସହାୟ ଯେଉଁ କାମ କରିଛନ୍ତି, ତାହାକୁ ନେଇ ସବୁ ଗାଁଲୋକ ଭାରି ଖୁସୀ | ଡାକ୍ତର ନିଯୁକ୍ତି ଦାବିରେ ଆମେ ତାଙ୍କ ସହ ବହୁତ ସ୍ଥାନକୁ ଯାଇଛୁ | ଗାଁରେ ଆମର ହସ୍ପିଟାଲଟିଏ ହୋଇଗଲା, ଏହାଠୁ ଭଲ କଥା ଆଉ କ'ଣ ଥାଇ ପାରେ |”

ଲୋକମାନେ କହନ୍ତି ବର୍ଷାଦିନେ ପାଣି ଆସିଯାଉଥିବାରୁ ଗାଁ ବାହ୍ୟ ଅଂଚଳରୁ ବିଚ୍ଛିନ୍ନ ହୋଇଯାଏ | ଏହି ପରିସ୍ଥିତିରେ ସହରକୁ ଯିବା ମୁସ୍କିଲ ହୋଇପଡେ | ତେଣୁ ଏହି ହସ୍ପିଟାଲ୍ ପୂରାପୂରି କାର୍ଯ୍ୟ ଆରମ୍ଭ କଲେ ପାଖାପାଖି ଅଂଚଳର ୨୫ ହଜାର ଲୋକ ଏଥିରୁ ଫାଇଦା ପାଇବେ | ସ୍ୱତନ୍ତ୍ର ପ୍ରସୂତି ବିଭାଗ ମହିଳା ଡାକ୍ତର ନିଯୁକ୍ତି ହେବାକୁ ଥିବାରୁ ବିଶେଷ କରି ମହିଳାମାନେ ବେଶୀ ଉପକୃତ ହେବେ | ଗାଁ ସ୍କୁଲର ଶିକ୍ଷକ ଭଗବତ ସିଂହ ଶେଖୱତ୍ କହନ୍ତି,

ଆଜିକାଲି ଏଭଳି ତ୍ୟାଗ କିଏ କରୁଛି | ସେ ତ ଆମ ଗାଁ ପାଇଁ ସବୁ କିଛି ବିକ୍ରି କରିଦେଇଛନ୍ତି | ତାଙ୍କର ଏହି କାର୍ଯ୍ୟକୁ କେବେହେଲେ କେହି ଭୁଲି ପାରିବେ ନାହିଁ |

କୁହାଯାଏ ବଡ କାମ ସେହିମାନେ କରନ୍ତି, ଯେଉଁମାନଙ୍କର ଭାବନା ବଡ ଥାଏ | ତେବେ କିଛି ଲୋକ ବଡକଥା ଭାବନ୍ତି, କିନ୍ତୁ ଏହି ଦିଗରେ ଠିକ୍ ବାଟରେ ପଦକ୍ଷେପ ନେଇପାରନ୍ତି ନାହିଁ | ଏଭଳି ଲୋକଙ୍କ ପାଇଁ ହନୁମାନ ସହାୟ ପ୍ରେରଣାର ଉତ୍ସ ପାଲଟିଯାଇଛନ୍ତି | ଯିଏ କେବଳ ବଡ ସ୍ୱପ୍ନ ଦେଖିନାହାନ୍ତି, ବଂର ତାହାକୁ ସତରେ ପରିଣତ କରିଛନ୍ତି | ହନୁମାନ ସହାୟଙ୍କ ଏହି ଉଦ୍ୟମକୁ ୟୋରଷ୍ଟୋରୀ ପକ୍ଷରୁ ସଲାମ୍‌ |

Akhand is a noted social worker, freelance journalist and writer. He basically writes on various development issues. Can be reached at: indiamediacentre@gmail.com / +91 9938871989

Related Stories